కరోనా టెస్ట్‌లు: ఏపీలో ఇలా.. తెలంగాణలో అలా.!

కరోనా టెస్టుల్లో ఆంధ్రప్రదేశ్‌ దూసుకెళ్తోంది.. తెలంగాణ మాత్రం మీన మేషాల్లెక్కెడ్తోంది ఇబ్బడి ముబ్బడిగా పరీక్షలు చేయడంలో. తాజాగా హైకోర్టు మొట్టికాయలేయడంతో తెలంగాణలో కరోనా టెస్టులు పెరుగుతాయా.? అన్న చర్చ సర్వత్రా జరుగుతోంది. ‘హైకోర్టు ఆదేశాల మేరకు టెస్టులు చేయడం కుదరని పని..’ అన్న అభిప్రాయం ప్రభుత్వం నుంచి వ్యక్తమవుతోంది. ‘చనిపోయిన ప్రతి ఒక్కరికీ కరోనా టెస్టులు చేయడం సాధ్యం కాదు..’ అన్నది తెలంగాణ ప్రభుత్వం వాదన.

ఇదిలా వుంటే, ఆంధ్రప్రదేశ్‌లో కరోనా పరీక్షలు మారు మూల గ్రామాల్లోనూ చేసేలా చర్యలు చేపడ్తోంది వైఎస్‌ జగన్‌ సర్కార్‌. కరోనా వైరస్‌ పట్ల అవగాహనా కార్యక్రమాల్ని మరింత పెంచాలనీ, ఏమాత్రం అనుమానమొచ్చినా స్వచ్ఛందంగా ప్రజలే వచ్చి పరీక్షలు చేయించుకునేలా వారిలో అవగాహన కల్పించాలనీ ముఖ్యమంత్రి వైఎస్‌ జగన్‌, అధికారులకు ఆదేశాలు జారీ చేశారు. ఇదిలా వుంటే, ఆంధ్రప్రదేశ్‌ స్థాయిలో కరోనా పరీక్షలు తెలంగాణలో జరిగితే.. కేసుల సంఖ్య చాలా ఎక్కువగా నమోదవుతుందనీ, అందుకే తెలంగాణ ప్రభుత్వం కరోనా పరీక్షల విషయంలో భయపడ్తోందనీ తెలంగాణలో విపక్షాలు విమర్శల బాణాల్ని ఎక్కుపెడుతుండడం గమనార్హం.

కాగా, గ్రేటర్‌ హైద్రాబాద్‌ పరిధిలో నమోదవుతున్న కేసులు, వైద్య విభాగంలో పెరుగుతున్న కేసుల పట్ల సర్వత్రా ఆందోళన వ్యక్తమవుతోంది. వైద్య సిబ్బందికి కరోనా సోకడం చాలా ఇబ్బందికరమైన సమస్య. అదే సమయంలో, కరోనా వైరస్‌కి చికిత్స అందిస్తున్న ప్రధాన ఆసుపత్రి అయిన గాంధీలో సరైన వసతులు లేవంటూ వస్తున్న రాజకీయ విమర్శలు, అందుకు అనుగుణంగా నెట్టింట్లో చక్కర్లు కొడుతున్న వీడియోలతో తెలంగాణ ప్రభుత్వం అలర్ట్‌ అయ్యింది. ప్రభుత్వంపై దుష్ప్రచారాన్ని తీవ్రంగా ఖండిస్తున్నారు ప్రభుత్వ పెద్దలు.

తెలంగాణలో కరోనా వైరస్‌తో బాధపడేవారికి వైద్య చికిత్స అందించేందుకు అన్ని సౌకర్యాలూ వున్నాయనీ, ఏ స్థాయిలో కేసులు నమోదైనా చికిత్స అందించడానికి సమస్య లేదన్నది తెలంగాణ ప్రభుత్వం చెబుతున్న మాట. మరి, పరిస్థితులు ఇంత అనుకూలంగా వున్నప్పుడు టెస్ట్‌లు తగిన స్థాయిలో ఎందుకు జరగడంలేదు.? ఈ ప్రశ్నకు ప్రభుత్వం నుంచి సరైన సమాధానమే దొరకడంలేదు.