ఇన్‌సైడ్‌ స్టోరీ: నందమూరి బాలకృష్ణకు ఆ ధైర్యముందా.?

నందమూరి బాలకృష్ణ.. ఇటు తెలుగు సినీ పరిశ్రమలోనూ, అటు రాజకీయాల్లోనూ హాట్‌ టాపిక్‌గా మారారిప్పుడు. సినీ పరిశ్రమకు సంబంధించిన విషయాలపైనా, రాజకీయాలపైనా గత కొద్ది రోజులుగా ఆయన చేస్తున్న ‘విపరీత వ్యాఖ్యలే’ అందుక్కారణం. ఇక్కడ ‘విపరీత వ్యాఖ్యలు’ అని ఎందుకు అనాల్సి వస్తోందంటే, తెలుగు సినీ పరిశ్రమ తరఫున తెలంగాణ ప్రభుత్వంతోనూ, ఆంధ్రప్రదేశ్‌ ప్రభుత్వంలోనూ ఓ బృందం చర్చలు జరుపుతోంటే.. దాన్ని ఆయన జీర్ణించుకోలేకపోతున్నారు మరి.

కరోనా వైరస్‌ కారణంగా తెలుగు సినీ పరిశ్రమ తీవ్రంగా నష్టపోయింది. ఈ నేపథ్యంలో పరిశ్రమ బాగు కోసం కొందరు నడుం బిగించారు. బాలకృష్ణ మాత్రం, ‘భూములు పంచుకోవడానికా.?’ అంటూ ఎద్దేవా చేస్తున్నారు. ఈ క్రమంలో ఆయన తెలంగాణలోని అధికార పార్టీని కూడా గట్టిగా కెలికేశారు. సినీ పరిశ్రమ ప్రముఖులు బాలయ్య విషయంలో ఆచి తూచి వ్యవహరిస్తున్నారు. ‘చెడుని చెవిలో చెప్పాలి.. మంచిని మైక్‌లో చెప్పాలి..’ అని ఆ మధ్య సినీ పరిశ్రమలోనివారికి చిరంజీవి హితబోధ చేస్తే, దానికీ బాలయ్య తాజాగా వక్రభాష్యం చెప్పారు.

తెలుగు సినీ పరిశ్రమ తరఫున నలుగురు అగ్రహీరోల్లో.. బాలకృష్ణ కూడా ఒకరు. చిరంజీవి మాత్రమే ఎందుకు బాధ్యత తీసుకోవాలి.? బాలకృష్ణ ముందడుగు వేసి.. ఆయనే ఆ పెద్దరికాన్ని అందిపుచ్చుకోవచ్చు కదా.? స్వర్గీయ నందమూరి తారకరామారావు తనయుడిగా బాలకృష్ణకి ఇటు సినీ పరిశ్రమలోనూ అటు రాజకీయాల్లోనూ ప్రత్యేకమైన గుర్తింపు వుందన్నది నిర్వివాదాంశం. ఇంకా నయ్యం.. బాలకృష్ణ, టీడీపీ బాధ్యతలు చేపట్టడానికే ధైర్యం చేయడంలేదు.. సినీ పరిశ్రమ బాధ్యతల్ని భుజానికెత్తుకుంటారా.? అన్నది ఇంకొందరి వెర్షన్‌.

ఎవరి వాదనలు ఎలా వున్నా.. బాలయ్యకు, సినీ పరిశ్రమలో జరుగుతున్న పరిణామాలపై స్పందించే బాధ్యత మాత్రమే కాదు.. సమస్యలపై స్పందించి.. పరిశ్రమ తరఫున ‘లీడ్‌’ తీసుకునే అవకాశం వుంది. కానీ, ఆయన దాన్ని సద్వినియోగం చేసుకోవడంలేదు. పరిశ్రమపై విమర్శలు చేయడానికి చాలామందే వున్నారు.. అలా బాలయ్య కూడా ‘గుంపులో గోవిందా’ అనడం వల్ల ఉపయోగమేంటి.?

ఇక్కడ మేటర్‌ క్లియర్‌.. బాలకృష్ణ డైరెక్ట్‌గానే చిరంజీవిపై విమర్శలు చేస్తున్నారు. చిరంజీవి నాయకత్వాన్ని బాలకృష్ణ అస్సలేమాత్రం జీర్ణించుకోలేకపోతున్నారు. కానీ, పరిశ్రమ అంతా చిరంజీవికి నాయకత్వ బాధ్యతల్ని అప్పగించింది. బాలయ్య విమర్శించారనో.. ఇంకో కారణంతోనో.. పరిశ్రమ తన భుజాల మీద పెట్టిన బాధ్యతను చిరంజీవి వదిలేసుకోలేరు కదా.!