బిగ్ హౌస్ కెప్టెన్‌గా శివజ్యోతి: మహేష్‌ రగిల్చిన ‘అగ్గిపుల్ల’.?

బిగ్‌బాస్‌ రియాల్టీ మూడో సీజన్‌లో ‘స్పైసీ’ మేటర్‌ తగ్గిందని నిర్వాహకులు ఫీలవడం, ఆ విషయాన్ని నాగార్జునతోనే డైరెక్ట్‌గా చెప్పించడం, ఈ క్రమంలో హౌస్‌మేట్స్‌ అలర్ట్‌ అవడం తెలిసిన సంగతులే. మహేష్‌ విట్టా తనకు దక్కిన ‘అగ్గిపుల్ల’ అవార్డు పట్ల తీవ్రంగా కలత చెందుతోంటే, ‘మధ్యలో పుల్ల పెట్టడానికి వచ్చావా.?’ అంటూ అలీ రెజా ఆగ్రహంతో ఊగిపోవడం, మహేష్‌ విట్టాకి ఒళ్ళు మండిపోయేలా చేసింది.

బాబా భాస్కర్‌ – అలీ రెజా మధ్య ‘నామినేషన్‌’ వ్యవహారంపై రగడ సాగుతున్న వేళ, ఇద్దరికీ సర్ది చెప్పేందుకు మహేష్‌ విట్టా ప్రయత్నించాడు. లాంగ్వేజ్‌ ప్రాబ్లమ్‌ ఒకటి వుంది కదా అలీకి. దాంతో, పొరపాటుగా అర్థం చేసుకుని, మహేష్‌ని తిట్టేశాడు. ఊహించని ఈ పరిణామంతో మహేష్‌ షాకయ్యాడు. ఆ తర్వాత హౌస్‌లోని ఇతర కంటెస్టెంట్స్‌ వద్ద తన ఆవేదనను చెప్పుకున్నాడు మహేష్‌.

అది తెలుసుకున్న అలీ రెజా, ఇంకోసారి మహేష్‌పై మండిపడిపోయాడు. ఈ క్రమంలో గొడవ బాగా ముదిరిపోయింది. కంట్రోల్‌ చేయడానికి ఎవరూ ప్రయత్నించలేదు సరికదా, గొడవని పెంచడానికే మిగతా హౌస్‌మేట్స్‌ ప్రయత్నించారు ఒకరిద్దరు తప్ప. ఇదిలా వుంటే, అలీ రెజా తనను వెన్నుపోటు పొడిచాడంటూ బాబా భాస్కర్‌ తీవ్ర ఆవేదన వ్యక్తం చేస్తున్నాడు. శ్రీముఖి ఇచ్చిన ఓదార్పుతో బాబా భాస్కర్‌ పైకి హుషారుగా కన్పిస్తున్నా, లోలోపల రగిలిపోతున్న మాట వాస్తవం.

మరోపక్క, వితిక – పునర్నవిలను సరదాగా ర్యాగింగ్‌ చేశారు శివజ్యోతి, శ్రీముఖి. ఆ తర్వాత కెప్టెన్‌ టాస్క్‌ ఇచ్చాడు బిగ్‌ బాస్‌. ఆ టాస్క్‌కి అర్హత సాధించారు శివజ్యోతి, వితిక షెరు. అయితే టాస్క్‌లో మాత్రం వితిక షెరు ఓడిపోయింది. అలా శివజ్యోతికి కెప్టెన్‌గా అవకాశం దక్కింది. ఆమెకి ఏ ఎమోషన్‌ అయినా ఒక్కటే.. అదే ఏడుపు. సహజంగానే ఏడుపుకి బ్రాండ్‌ అంబాసిడర్‌ అయిన శివజ్యోతి, కెప్టెన్‌గా అవకాశం దక్కాక కూడా అదే ఎమోషన్‌ని పండించింది.

మొత్తమ్మీద, బిగ్‌హౌస్‌లో ఓ పెద్ద అపార్థమైతే చోటు చేసుకుంది. నిజానికి నిర్వాహకులకు కావాల్సింది కూడా అదే. కొట్టుకునేదాకా వ్యవహారం వెళ్ళేలా ఆ వివాదం నడిచిందిగానీ, సద్దుమణగడం కొంత సంతోషించదగ్గ విషయం.