ఓటిటి మూవీ రివ్యూ: జోహార్ – హార్ట్ టచింగ్ ఎమోషనల్ రైడ్.!

నైనా గంగూలీ, చైతన్య కృష్ణ, ఎస్తర్ అనిల్, ఈశ్వరి రావు, శుభలేఖ సుధాకర్ ప్రధాన పాత్రల్లో తేజ మర్ని దర్శకుడుగా పరిచయం అవుతూ చేసిన సినిమా ‘జోహార్’. టీజర్, ట్రైలర్ తో ఆకట్టుకున్న ఈ సినిమా కరోనా ఎఫెక్ట్ వలన డైరెక్ట్ గా ఆహా ఓటిటి ప్లాట్ ఫామ్ లో రిలీజయ్యింది. యంగ్ టాలెంట్ అంతా కలిసి చేసిన ఈ జోహార్ సినిమా ఎంత ఎంజాయ్ చేసేలా ఉందో ఇప్పుడు చూద్దాం..

కథ:

రోడ్డు మీద సర్కస్ చేస్తూ, పరుగు పందెంలో దేశం కోసం గోల్డ్ మెడల్ గెలవాలనుకునే అమ్మాయి బాల(నైనా గంగూలీ)…
తన ప్రాణం పోయినా తన హాస్టల్లో పిల్లలకి సరైన తిండి, వసతి కల్పించాలని ప్రభుత్వ నిధుల కోసం తిరిగే వ్యక్తి బోస్(శుభలేఖ సుధాకర్)…
ఉద్దానం కిడ్నీ సమస్యతో భర్తని పోగొట్టుకొని కూతుర్ని కూడా పోగొట్టుకొనే పరిస్థితిలో ఉన్న తల్లి గంగమ్మ(ఈశ్వరి రావు)…
చదువే జీవితం అనుకొని ప్రేమించిన వ్యక్తితో రాజమండ్రి పారిపోయిన వేశ్య కూతురు జ్యోతి(ఎస్తర్ అనిల్)…

ఇలా ఒకరితో ఒకరికి సంబంధం లేని నాలుగు జీవితాలు.. ఆంధ్ర రాష్ట్ర ముఖ్యమంత్రి అచ్యుత రామయ్య చనిపోవడంతో ఆ స్థానంలోకి వచ్చిన తన వారసుడు సీఎం విజయ్ వర్మ (చైతన్య కృష్ణ), తన పార్టీ పరువు, తన తండ్రి విగ్రహాన్ని ప్రపంచమంతా చెప్పుకునేలా ప్రపంచంలోనే అత్యంత ఎత్తైన విగ్రహం నిర్మించాలని అనుకుంటాడు. ఆ నిర్ణయం వలన పై నాలుగు జీవితాల్లో కలిగిన మార్పులేంటి? వారి వారి సమస్యలకు ఏదైనా పరిష్కారం దొరికిందా? లేక ఆ యంగ్ సీఎం తీసుకున్న నిర్ణయం వలన రాష్ట్ర ప్రజలకి జరిగిన నష్టమేంటి? అన్నదే కథ.

తెర మీద స్టార్స్..

వారు వీరు అని కాదు తెరమీద కనిపించిన చిన్న పిల్లల నుంచి సీనియర్ ఆర్టిస్టుల వరకూ ప్రతి ఒక్కరూ అద్భుతమైన నటనని కనబరిచారు. అన్ని కథల్లోకి ఎక్కువ ఎంగేజింగ్ గా అనిపించేది ఈశ్వరి రావు కథ. ఈ తల్లి – కూతురి ఎమోషన్స్ పలు చోట్ల కళ్ళలో నీళ్లు తిరిగేలా చేస్తే, అంకిత్ – ఎస్తర్ లు రియలిస్టిక్ లవ్ స్టోరీ మనం భావోద్వేగానికి లోనయ్యేలా చేస్తుంది. మిగిలిన రెండు కథల్లో శుభలేఖ సుధాకర్, నైనా గంగూలీలు ది బెస్ట్ పెర్ఫార్మన్స్ తో ఆకట్టుకున్నారు. ఇప్పటికే వరకూ ఓన్లీ గ్లామర్ రోల్స్ మాత్రమే కనిపించిన నైనా గంగూలీకి ఇందులో తన టాలెంట్ ని చూపించే అవకాశం దక్కింది. చేసింది ఒక్క సీన్ అయినప్పటికీ రోహిణి గారి బెస్ట్ వర్క్స్ లో నిలిచిపోతుంది.

తెర వెనుక టాలెంట్..

సాంకేతిక విభాగంలో నాలుగు డిపార్ట్మెంట్స్ మాత్రం 100కి 200 మార్కులు కొట్టేశాయి.. వారిలో మొదటిగా చెప్పుకోవాల్సింది, డైలాగ్ రైటర్ రామ్ వంశీ కృష్ణ.. అతను ప్రతి కథలోనూ, ప్రతి పాత్రకి ముత్యాల్లాంటి మాటలు రాశారు. ప్రతి మాట మిమ్మల్ని అబ్బురపరుస్తుంది, ఆలోచింపజేస్తుంది. ఈ సినిమా సక్సెస్ లో ఫస్ట్ సగం క్రెడిట్ ఇతని డైలాగ్స్ కి ఇవ్వచ్చు. తరువాతి రెండు డిపార్ట్మెంట్స్ మ్యూజిక్ అండ్ సినిమాటోగ్రఫీ.. దర్శకుడు అనుకున్న భావాల్ని డిఓపి ఓ దృశ్య కావ్యంలా తెరపైకి అనువదిస్తే మ్యూజిక్ డైరెక్టర్ ప్రియదర్శన్ దానికి ప్రాణం పోసి చూసిన వారి మనసును బరువెక్కిపోయి, కళ్ళు చెమ్మగిల్లేలా చేశారు. ఇక చివరిగా గాంధీ ఆర్ట్ వర్క్ కూడా ప్రతి కథకి జీవం పోసింది. వీరి ముగ్గురి పని తనం సినిమాని దృశ్యం, శ్రవణం పరంగా నెక్స్ట్ లెవల్ కి తీసుకెళ్లింది. సిద్దార్థ – అన్వర్ అలీ ఎడిటింగ్ కూడా చాలా స్మూత్ గా ఉంది. అక్కడక్కడా స్పీడ్ కట్స్ చేసి ఉంటే ఇంకా బాగుండేది.

ఇక కెప్టెన్ ఆఫ్ ది షిప్., తేజ మర్ని విషయానికి వస్తే.. దేశం సంక్షోభంలో ఉన్నా, పేదరికం పెరిగిపోతున్నా, సామాన్యులకి జీవనం అసాధ్యం అయిపోతున్నా ప్రభుత్వాలు పట్టించుకోకుండా వారి విగ్రహ రాజకీయాలు వారు చేసుకుంటూ పోతుంటారు అనే ఇతివృత్తాన్ని కథాంశంగా సెలక్ట్ చేసుకోవడం ఈ సినిమాకి అతిపెద్ద బలం.. ప్రభుత్వం తీసుకొనే ఒక తప్పుడు నిర్ణయం ప్రజలకి ఎంతటి నష్టాన్ని చేకూరుస్తుంది అనేది కళ్ళకు కట్టినట్లు చూపించారు. కథ పరంగా ఎంచుకున్న పాయింట్ ని పర్ఫెక్ట్ గా చూసే ఆడియన్స్ కి కనెక్ట్ అయ్యేలా చేశారు. అందుకు మెచ్చుకునే తీరాలి. కథనం పరంగా మొదటి భాగం బాగుందనిపించినా, రెండవభాగం మాత్రం ప్రతిదీ మనం ఊహించేయగలగడంతో కాస్త బోరింగ్ గా వెళుతుంది. మళ్ళీ క్లైమాక్స్ లో రోహిణి సీన్ తో పరవాలేధనిపించి, ముగించడం బాగనిపిస్తుంది. ఇక డైరెక్టర్ గా అనుకున్నది తీయడంలో ది బెస్ట్ ఇచ్చాడని చెప్పాలి. సందీప్ మర్ని – రత్నాజీ రావు మర్ని నిర్మాణ విలువలు కూడా ఎక్కడా కాంప్రమైజ్ కాకుండా ఉన్నాయి. చివరిలో విగ్రహం కోసం వాడిన సిజి షాట్స్ కూడా సూపర్బ్.

విజిల్ మోమెంట్స్:

– అందరి నటీనటుల నటన
– ఎమోషనల్ సీన్స్ అండ్ డైలాగ్స్
– కథాంశం
– మ్యూజిక్ అండ్ సినిమాటోగ్రఫీ
– మొదటి అర్ధభాగం మరియు క్లైమాక్స్

బోరింగ్ మోమెంట్స్:

– ఊహాజనిత రెండవ అర్ధభాగం
– ఇంకాస్త బెటర్ గా ఉండాల్సిన కథనం
– రెగ్యులర్ ఎంటర్టైన్మెంట్ లేకపోవడం

విశ్లేషణ:

ప్రజలకి సేవ చేయాల్సిన నాయకులు సొంత ప్రయోజనాల కోసం తీసుకునే ఒక్కో నిర్ణయం ప్రజలపై ఎలాంటి ఉక్కుపాదం మోపుతోంది అనేది చెప్పడమే ఈ జోహార్.. ఇటు నటీనటునటులు, అటు సాంకేతిక నిపుణులు ది బెస్ట్ అవుట్ ఫుట్ ఇస్తే ఎలా ఉంటుందో చెప్పగలిగే సినిమా ‘జోహార్’. ఊహాజనిత సెకండాఫ్, స్లోగా సాగే కథనం మరియు రెగ్యులర్ గా కోరుకునే ఎంటర్టైన్మెంట్ లేకపోవడం ఈ సినిమాకి మైనస్ అయితే, చూసిన వారికి మాత్రం ఇదొక హార్ట్ టచింగ్ ఎమోషనల్ రైడ్ లా అనిపిస్తుంది.

చూడాలా? వద్దా?: మాకు మూస సినిమాలే నచ్చుతాయి అనుకునే వారు తప్ప, మిగతా అందరూ చూడచ్చు.!

తెలుగుబులెటిన్.కామ్ రేటింగ్: 3/5