మంత్రి అనిల్.. ఎమ్మెల్యే కాకాణి.. సై అంటే సై..

నెల్లూరు జిల్లాలో అధికార పార్టీ నేతల మధ్య విభేదాలు భగ్గుమన్నాయి. మంత్రి అనిల్, పార్టీ జిల్లా అధ్యక్షుడు, సర్వేపల్లి ఎమ్మెల్యే కాకాణి గోవర్థన్ రెడ్డి ఒకరిపై మరొకరు సై అంటే సై అంటున్నారు. మట్టి తినేస్తున్నారని ఒకరు, ఇసుక దోచేస్తున్నారని మరొకరు పరస్పరం ఫిర్యాదులు చేసుకోవడంతో అధికారులు అకస్మాత్తుగా దాడులు చేశారు. సర్వేపల్లి రిజర్వాయర్ లో మట్టి తవ్వకాల్లో అక్రమాలు జరిగాయని.. అనుమతులకు మించి తవ్వకాలు జరిగాయని ఆరోపణలు రావడంతో విచారణ జరపాలని మంత్రి అనిల్ ఆదేశించారు. దీంతో సోమవారం ఇరిగేషన్ శాఖ అధికారులు విచారణ జరిపి దాదాపు 10వేల క్యూబిక్ మీటర్ల మట్టి ఎక్కువగా తవ్వినట్టు నిర్ధారించారు. మరోవైపు మంత్రి అనిల్ పరిధిలోని పెన్నా నదిలో ఇసుక, మట్టి తవ్వకాల్లో కూడా అక్రమాలు జరిగాయంటూ కాకాణి చేసిన ఫిర్యాదుపై రంగంలోకి దిగిన అధికారులు అక్కడ కూడా తనిఖీలు చేశారు. వాస్తవానికి ఈ వ్యవహారాలు రెండేళ్ల నుంచి సాగుతున్నా.. ప్రస్తుతం ఈ ఇద్దరు నేతల మద్య విభేదాలు తారాస్థాయికి చేరడం.. ఒకరిపై మరొకరు ఆరోపణలు గుప్పించి అధికారులను నిలదీయడంతోనే దాడుల జరిగాయని అంటున్నారు. వీరి మధ్య విభేదాలను పరిష్కరించాలని పార్టీ పెద్దలు గతంలోనే ప్రయత్నాలు చేసినా ఫలించలేదు. తాజాగా వీరిద్దరి వ్యవహారం అధిష్టానం వద్దకు చేరిందని సమాచారం. త్వరలోనే అమరావతిలో ఇద్దరు నేతలను కూర్చోబెట్టి మాట్లాడే అవకాశం ఉంది.