ఆంధ్రపదేశ్ ప్రభుత్వం దగ్గర 50 లక్షలు కూడా లేవా.?

చిత్తూరు జిల్లాలో ఓ రోడ్డు వేసినందుకు 21.41 లక్షల రూపాయలు ఖర్చయితే, దానికి సంబంధించిన బిల్లు ఖరారైనా చెల్లింపులు ప్రభుత్వం నుంచి జరగలేదని ఓ కాంట్రాక్టరు హైకోర్టును ఆశ్రయించారు. ఇలాంటిదే ఇంకో కేసు విషయంలోకి వెళితే, తూర్పుగోదావరి జిల్లాకి చెందిన ఓ కాంట్రాక్టరు ప్రభుత్వం నుంచి రావాల్సిన సుమారు 26 లక్షల రూపాయల సొమ్ము విషయమై కోర్టుకెళ్ళారు. ఈ రెండు కేసుల విచారణ సందర్భంగా హైకోర్టు కీలక వ్యాఖ్యలు చేసింది.

చిన్న మొత్తాల్ని కాంట్రాక్టర్లకు ఎందుకు చెల్లించడంలేదు.? అని హైకోర్టు ప్రశ్నిస్తే, ప్రభుత్వం తరఫున న్యాయవాది సమాధానమిస్తూ, నిధులు లేవని సెలవిచ్చారు. దాంతో, హైకోర్టు తీవ్ర ఆగ్రహం వ్యక్తం చేసింది. ఆర్థిక పరిస్థితిపై పంచాయితీ రాజ్ కార్యదర్శి, ఆర్థిక శాఖ కార్యదర్శి పూర్తి వివరాలతో హాజరు కావాలంటూ ఆదేశించింది హైకోర్టు.

మొత్తంగా చూస్తే, 50 లక్షలు కూడా కాదు. ప్రభుత్వ పెద్దలు తమ పబ్లిసిటీ కోసం పత్రికల్లో, ఎలక్ట్రానిక్ మీడియాలో ఇచ్చుకుంటున్న ప్రకటనలతో పోల్చితే ఇది చాలా చిన్న మొత్తం. అంతేనా, కొంతమంది సలహాదారులకు చెల్లిస్తోన్న చెల్లింపుల కంటే తక్కువేనన్న వాదనలూ లేకపోలేదు. పనులు 2018 – 2019 సంవత్సరాల్లో జరిగిన దరిమిలా, బహుశా అప్పటి టీడీపీ హాయాంలో జరిగిన పనులు కాబట్టే, చెల్లింపులు జరగలేదేమోనన్నది ఇంకో వాదన.

అయినా, హైకోర్టు ముందర, ‘నిధుల్లేవు..’ అని ప్రభుత్వం తరఫు న్యాయవాది ఎలా చెప్పగలిగారబ్బా.? రాష్ట్ర ప్రభుత్వం దగ్గర డబ్బుల్లేవని ఇలా హైకోర్టుల్లో న్యాయవాదులు చెబుతోంటే, రాష్ట్రంలో పెట్టుబడులు పెట్టేవారు ఎవరైనా ముందుకొస్తారా.? అవన్నీ ఓ యెత్తు.. ఒకటి కాదు, రెండు కాదు.. ఏకంగా మూడు రాజధానుల్ని నిర్మించేస్తామంటోంది వైఎస్ జగన్ ప్రభుత్వం. నిధులు లేకుండా రాజధాని నిర్మాణం ఎలా.? సొంత పబ్లిసిటీ కోసం నిథులు వుంటాయ్.. ఓటు బ్యాంకు రాజకీయాల కోసం సంక్షేమ పథకాలకు ఖర్చు చేయడానికీ నిథులు వుంటాయి. కానీ, కాంట్రాక్టర్లకు బిల్లులు చెల్లించాలంటే మాత్రం డబ్బులుండవ్.. ఈ ‘పాలనా మాయ’ ఏంటి చెప్మా.?