వీడని డెల్టా వేరియంట్.. 3 రాష్ట్రాల్లో వెలుగులోకి..

దేశంలో కరోనా కేసులు తగ్గుముఖం పడుతున్నా.. కొత్త రకం డెల్టా వేరియంట్ మాత్రం వీడటంలేదు. రెండో దశలో అల్లకల్లోలం సృష్టించిన డెల్టా వేరియంట్.. ప్రస్తుతం డెల్టా ప్లస్ గా రూపాంతరం చెందింది. తాజాగా ఇది మూడు రాష్ట్రాల్లో వెలుగుచూసినట్టు తెలుస్తోంది. మహారాష్ట్రతోపాటు కేరళ, మధ్యప్రదేశ్ లలో ఇది విస్తరించినట్టు వార్తలు వస్తున్నాయి. అయితే, ప్రస్తుతం దీనిని వేరింట్ ఆఫ్ ఇంట్రెస్ట్ గా మాత్రమే కేంద్రం వర్గీకరించింది. దాని తీవ్రతను బట్టి ఆందోళనకర వేరియంట్ గా నిర్ణయిస్తుంది. మహారాష్ట్రలో ఇప్పటివరకు 21 డెల్టా ప్లస్ వేరియంట్ కేసుల గుర్తించగా.. అత్యధికంగా రత్నగిరిలో 9 కేసులు బయటపడ్డాయి. మే 15 నుంచి 7,500 నమూనాలకు జీనోమ్ సీక్వెన్సింగ్ చేపట్టగా.. 21 కేసులు గుర్తించినట్టు మహారాష్ట్ర ఆరోగ్యశాఖ వెల్లడించింది. ఇక కేరళలో మూడు కేసులు, మధ్యప్రదేశ్ లో ఒక కేసు బయటపడినట్టు సమాచారం. దీంతో ఆయా రాష్ట్రాల్లో ఆందోళన వ్యక్తమవుతోంది. పైగా మోనోక్లోనల్ యాంటీబాడీ కాక్ టెయిల్ ఔషధాన్ని సైతం డెల్టా ప్లస్ వేరియంట్ ఏమారుస్తుందనే వార్తలు మరింత ఆందోళన కలిగిస్తున్నాయి.