ధాన్యం బకాయిలు చెల్లించండి.. జగన్ కు బాబు లేఖ

రైతులకు ధాన్యం బకాయిలు వెంటనే చెల్లించాలని టీడీపీ అధినేత చంద్రబాబు డిమాండ్ చేశారు. ఈ మేరకు ఆయన గురువారం సీఎం జగన్ కు లేఖ రాశారు. ధాన్యం బకాయిలు చెల్లించకపోవడంతో రైతులు తీవ్రంగా నష్టపోతున్నారని.. అలాగే మద్దతు ధరకు ధాన్యం కొనుగోలు చేయడంలోనూ ప్రభుత్వం విఫలమైందని పేర్కొన్నారు. రైతు ప్రభుత్వం అని చెప్పి వారిన నిండా ముంచే విధానాలు అవలంభిస్తున్నారని ధ్వజమెత్తారు. తమ ప్రభుత్వ హయాంలో ధాన్యం కొనుగోలు చేసిన 48 గంటల్లోనే రైతుల ఖాతాల్లో నగదు జమచేసేవారమని తెలిపారు. జగన్ పాలనలో 21 రోజులకు బకాయిలు పెంచారని.. ఇప్పుడు అది కూడా మరింత పెరిగిపోయిందని దుయ్యబట్టారు. ధాన్యం కొనుగోలు చేసి రెండు నెలలు దాటినా ఎవరూ పట్టించుకోవడంలేదని విమర్శించారు. పంటలు పండించేందుకు రైతులు తీసుకొచ్చిన అప్పులకు వడ్డీలు ఎవరు కడతారని ప్రశ్నించారు. అంతేకాకుండా ఖరీఫ్ కు పెట్టుబడులు ఎవరిస్తారని నిలదీశారు. ఒక్క గోదావరి జిల్లాల్లోనే రైతులకు రూ.2500 కోట్ల బకాయిలు ఉన్నాయని తెలిపారు. వెంటనే రైతులకు బకాయిలు చెల్లించాలని చంద్రబాబు డిమాండ్ చేశారు.