ఆ బాటిళ్లు పక్కన పెట్టాడు.. రూ.29వేల కోట్లు పోయాయి

ఓ క్రీడాకారుడ యథాలాపంగా చేసిన ఓ చిన్న చర్య.. ఓ పెద్ద కంపెనీకి రూ.29వేల కోట్ల నష్టం కలిగించింది. ప్రముఖ ఫుట్ బాల్ స్టార్ క్రిస్టియానో రొనాల్డో మంగళవారం యూఈఎఫ్ఏ యూరో మ్యాచ్ కు ముందు ప్రెస్ మీట్ నిర్వహించారు. ఈ సందర్భంగా టేబుల్ మీద ఆ టోర్నీ స్పాన్సర్ అయిన కోకకోలాకు చెందిన రెండు బాటిళ్లను ఉంచారు. ఫిట్ నెస్ విషయంలో ఎంతో అప్రమత్తంగా ఉండే రొనాల్డో.. అక్కడ నుంచి ఆ బాటిళ్లను తీసేసి దూరంగా పెట్టాడు. పక్కనే ఉన్న వాటర్ బాటిల్ తీసుకుని ‘మంచినీళ్లు తాగండి’ అని వ్యాఖ్యానించాడు. రొనాల్డో చాలా సాధారణంగానే ఇలా అన్నప్పటికీ, కోకకోలా షేర్లపై చాలా తీవ్ర ప్రభావం చూపింది. స్టాక్ మార్కెట్లో ఆ షేరు విలువ 1.6 శాతం పడిపోయింది. దీంతో ఆ కంపెనీ మార్కెట్ విలువ 242 బిలియన్ డాలర్ల నుంచి 238 బిలియన్ డాలర్లకు పడిపోయింది. అంటే దాదాపు రూ.29వేల కోట్ల విలువైన సంపద ఆవిరైపోయింది. దీంతో నష్టనివారణ చర్యలకు దిగిన కోకకోలా.. ప్రతి ఒక్కరికి నచ్చిన డ్రింక్ ను ఎంచుకునే హక్కు ఉంటుందని పేర్కొంది.