ఒకే కాన్పులో 10 మంది శిశువులు జననం..! సౌతాఫ్రికా మహిళ రికార్డు

జనాభా విషయంలో ఒక్కో దేశంలో ఒక్కో పద్ధతి ఉంటుంది. మన దేశంలోనే గతంలో ఇద్దరు చాలు ఆపై వద్దు అనేవారు. ఇప్పుడు ఒక్కరు చాలు అనే పరిస్థితి ఉంది. ఎందుకంటే ఒకర్ని కనటానికే ఇబ్బందులు పడుతున్నారు ప్రస్తుత రోజుల్లో. ఇటివల ముగ్గురు పిల్లల్ని కనటానికి అనుమతిచ్చింది చైనా ప్రభుత్వం. కానీ.. ఆ నిర్ణయంపై విమర్శలు వచ్చాయి. ఇటువంటి పరిస్థితుల్లో ఓ మహిళ ఏకంగా ఒకే కాన్పులో 10 మంది పిల్లలకి జన్మనిచ్చింది. చదవడానికి ఆశ్చర్యంగా ఉన్నా ఇది నిజం. ఈ అద్భుతాన్ని చేసి చూపింది దక్షిణాఫ్రికా మహిళ. ఒకే కాన్పులో ఏడుగురు మగ శిశువులు, ముగ్గురు ఆడ శిశువులకు జన్మనిచ్చింది. వివరాల్లోకి వెళ్తే..

దక్షిణాఫ్రికాలోని ప్రిటోరియాకు చెందిన గోసియామి తమారా సితోలే అనే 37 ఏళ్ల మహిళ రెండో కాన్పుకు వెళ్లింది. అప్పటికే మొదటి కాన్పులో కవల పిల్లలు ఉన్నారు. అయితే.. రెండో కాన్పులో మాత్రం ఆ సంఖ్య 5 రెట్లు పెరిగింది. నిజానికి ఆమె గర్భంలో 6గురు శిశువులు ఉన్నట్టు తొలుత డాక్టర్లు స్కానింగ్ చేసి చెప్పారు. అయితే.. మలి రిపోర్టుల్లో ఆ సంఖ్య 8గా తేలింది. కానీ.. ప్రసవంలో మాత్రం 10 మంది శిశువులు జన్మించారు. ఇదే అద్భుతంగా మారింది. ఇది చూసి వైద్యులే ఆశ్చర్యపోతున్నారు. ఆమె భర్త టెబోగో సిటెట్సీ మాత్రం మహాదానందంలో ఉన్నాడు. ఆనందంలో మాటలు రావడం లేదంటున్నాడు. ప్రస్తుతం శిశువులందరినీ ఇన్ క్యుబేషన్ లో ఉంచారు.

గత మే నెలలో మొరాకోకు చెందిన మలియాన్ హలిమా కిస్సీ అనే మహిళ ఒకసారి 9 మంది శిశువులకు జన్మనిచ్చింది. గోసియామి ఆ రికార్డును బ్రేక్ చేసింది. గోసియామి స్థానికంగా ఓ రిటైల్ స్టోర్ లో మేనేజర్ గా పని చేస్తోంది. పుట్టిన శిశువులందరూ ఆరోగ్యంగానే ఉన్నారని ఆమె భర్త మీడియాకు తెలిపాడు. విశేషమేంటంటే గోసియామి 7 నెలల 7 రోజులు మాత్రమే గర్భం ధరించి నెలలు నిండకుండానే  జన్మనిచ్చింది. కృత్రిమ గర్భధారణ కోసం జరిపే ట్రీట్ మెంట్ల వల్ల ఇలా జరుగుతుందని వైద్యులు అంటున్నారు. ఏదేమైనా.. గోసియామీ నెలకొల్పిన రికార్డు గిన్నీస్ కు వెళ్తుందేమో చూడాలి.