రానా ‘అరణ్య’ మూవీ రివ్యూ – మెసేజ్ సూపర్, సినిమా వీక్.!

‘ఫారెస్ట్ మాన్ అఫ్ ఇండియా‘గా పేరు తెచ్చుకున్న జాదవ్ పయెంగ్ లైఫ్ ని స్ఫూర్తిగా తీసుకొని రానా దగ్గుబాటి పాత్రని డిజైన్ చేసి చేసిన సినిమా ‘అరణ్య’. ఒకేసారి తెలుగు, తమిళ, హిందీ భాషల్లో వేరు వేరు నటులతో పాన్ ఇండియా ఫిల్మ్ గా రూపొందిన ఈ సినిమా మార్చ్ 26న ప్రేక్షకుల ముందుకు వచ్చింది. మరి ఈ సినిమా ఎలా ఉందో ఇప్పుడు చూద్దాం..

కథ:

తన తాతలు 500 ఎకరాల అటవీ ప్రాంతాన్ని ప్రభుత్వానికి రాసిచ్చేస్తే, ఆ అడవిలోనే పెరిగి, అక్కడి ఏనుగులకు, అడవికి 40 ఏళ్లుగా సంరక్షకుడిగా ఉంటూ, లక్షకి పైగా చెట్లు నాటినందుకు గాను రాష్ట్రపతి చేత ఫారెస్ట్ మాన్ అఫ్ ఇండియా అవార్డు అందుకుంటాడు నరేంద్ర భూపతి అలియాస్ అరణ్య(రానా దగ్గుబాటి). అడవి, ఏనుగులు, అక్కడి ప్రజలు అందరూ బాగున్నారు అనుకునే టైంలో అటవీ శాఖ మంత్రి కనకమేడల రాజగోపాలం(అనంత్ మహదేవన్) ఆ అడవిలో 60 ఎకరాల్లో ఒక స్మార్ట్ సిటీ కట్టాలని అనుకుంటాడు. అనుకోవడమే కాకుండా వర్క్ కూడా మొదలు పెడతాడు. ఆ వర్క్ ని ఆపించడం కోసం అరణ్య కోర్టు నుంచి స్టే తెచ్చినా పనులు ఆపకపోవడమే కాకుండా అరణ్య పిచ్చి వాడని కొద్దీ నెలలు జైల్లో పెడతారు. అరణ్య జైలు నుంచీ వచ్చే సరికి 60కిమీ విస్తీర్ణంలో గోడ కట్టేస్తారు. దాని వలన ఆ అడవిలోని ఏనుగులకు వాటర్ ఉండదు. అక్కడి నుంచీ అరణ్య ఆ ఆడవి కోసం, ఆ ఏనుగుల కోసం ఎలా పోరాడాడు? చివరికి అరణ్య కనకమేడల రాజగోపాలం పవర్ ముందు ఓడిపోయాడా? లేక గెలిచి ఆ గోడల్ని పడగొట్టించి మళ్ళీ ఆ ప్రాంతాన్ని దక్కించుకున్నాడా? లేదా? అనేదే కథ.

తెరమీద స్టార్స్..

రానా దగ్గుబాటి ఇందులో అద్భుతమైన నటనని కనబరిచాడు అనడంలో అతిశయోక్తి కాదు. కంప్లీట్ డిఫరెంట్ గెటప్, మ్యానరిజమ్స్ మరియు డైలాగ్ డెలివరీతో చాలా భిన్నంగా అనిపిస్తాడు. అలాగే నటుడిగా తనకి ఎంతో గుర్తింపునిచ్చే చిత్రంగా అరణ్య నిలుస్తుంది. విష్ణు విశాల్ తనకిచ్చిన పాత్రలో బాగా చేసాడు. జోయా హుస్సేన్, శ్రియ పిల్లాన్కర్ లవి చిన్న పాత్రలే అయినా ఓకే అనిపించారు. రఘుబాబు డైలాగ్స్ అక్కడక్కడా నవ్వు తెప్పిస్తాయి. విలన్ పాత్రలో కనిపించిన అనంత్ మహదేవన్, రవి కాలే లు బాగా చేశారు.

తెర వెనుక టాలెంట్..

ఈ సినిమాకి ప్రత్యేక హైలైట్ గా నిలిచింది విజువల్స్ అండ్ మ్యూజిక్. రియల్ లొకేషన్స్ లో షూట్ చేసిన ప్రతి విజువల్ ని చాలా రియలిస్టిక్ గా చూపించడంతో బాగా అనిపిస్తుంది. కానీ పలు చోట్ల చేసిన సిజి షాట్స్ మాత్రం సరిగా లేదు. దాంతో సిజి షాట్ విజువల్స్ డిస్టర్బన్స్ గా అనిపిస్తాయి. పాటలు అంతగా అనిపించకపోయినా నేపధ్య సంగీతం మాత్రం చాలా సీన్స్ లో మంచి ఫీల్ ని జెనరేట్ చేస్తుంది. ఫారెస్ట్ బ్యాక్ డ్రాప్ కావడం వలన రసూల్ పూకుట్టి చేసిన సౌండ్ ఎఫెక్ట్స్ చాలా బాగా అనిపిస్తాయి. ఎడిటింగ్ లో ఎక్కువ జంప్ కట్స్ ఫీలింగ్ వస్తుంది. రన్ టైంని తగ్గిసిన్హాడంలో జరిగిన లోపమని క్లియర్ గా అర్థమవుతుంది.

ఇక ఎన్నో మంచి చిత్రాలను అందించిన ప్రభు సోలమన్ ఈ మూవీ కోసం ‘ఫారెస్ట్ మాన్ అఫ్ ఇండియా’గా పేరు తెచ్చుకున్న జాదవ్ పయెంగ్ లైఫ్ ని స్ఫూర్తిగా తీసుకొని చెప్పాలనుకున్న పాయింట్ చాలా బాగుంది. కానీ కథగా అంట ఆసక్తికరంగా చెప్పలేకపోయారు. ఎందుకంటే ఈ బ్యాక్ డ్రాప్ లో పలు కథలను చూసి ఉన్నాం. అలాగే కథనంలో కూడా ఎమోషనల్ కనెక్ట్ ని ఎక్కువగా తీసుకెళ్ళాలి. కానీ అది మిస్ అయ్యారనిపిస్తుంది. దానికి కారణం లెంగ్త్ ఎక్కువ అనిపించడం వలన చాలా కట్స్ చేశారు. అందువలన సెకండాఫ్ లో పూర్తిగా ఎమోషనల్ కనెక్షన్ మిస్ అయ్యింది. మొదట్లో పాత్రల పరిచయం బాగుంది, కనెక్ట్ అవుతాం కూడా కానీ ఆ తర్వాత పాత్రలని తీసుకెళ్లిన విధానం, లాజికల్ గా మిస్ అయిన అంశాలు సినిమాకి డిస్కనెక్ట్ అయ్యేలా చేస్తాయి. అంతేకాకుండా విష్ణు విశాల్ కథ ఆయన గత సినిమాలను(కుంకీ) పోలి ఉంది. ఓవరాల్ గా డైరెక్టర్ గా లెగ్థ్ ఎక్కువైనా ఎమోషనల్ జర్నీని క్లియర్ గా చూపించి ఉంటె కనెక్ట్ అయ్యేవారేమో. ఎరోస్ నిర్మాణ విలువలు ఓకే.

విజిల్ మోమెంట్స్:

– రానా అద్భుతమైన నటన
– స్టోరీ లైన్ అండ్ మెసేజ్
– బ్యాక్ గ్రౌండ్ మ్యూజిక్ అండ్ సౌండ్ డిజైన్
– మొదటి 30 నిమిషాలు

బోరింగ్ మోమెంట్స్:

– కథని చెప్పిన విధానం
– ఊహాజనిత కథనం
– ఎడిటింగ్
– ఎమోషనల్ కనెక్షన్ ని మిస్ చేయడం
– వీక్ డైరెక్షన్

విశ్లేషణ:

రియల్ లైఫ్ పర్సన్ స్పూర్తితో, ఓ సూపర్బ్ మెసేజ్ తో వచ్చిన ‘అరణ్య’ సినిమా కోసం తన వంతుగా రానా దగ్గుబాటి బెస్ట్ పెర్ఫార్మన్స్ తో ఆడియన్స్ ని సర్ప్రైజ్ చేస్తాడు. కానీ కథని తీర్చిదిద్దిన విధానం, కీలకమైన ఎమోషనల్ బాండింగ్ ని ప్రేక్షకులకి కనెక్ట్ చేయలేకపోవడంతో పాటు, మొదటి 30 నిమిషాల్లో జెనరేట్ చేసిన ఓ మంచి ఫీల్ ని చివరి వరకూ హోల్డ్ చేయలేకపోవడం వలన సినిమా చూసే ప్రతి ప్రేక్షకుడిలో పాయింట్ బాగున్నా ఇంట వీక్ గా చెప్పారేంటి అనే ఫీలింగ్ ని కలగజేస్తుంది.

చూడాలా? వద్దా?: థియేటర్స్ లో ఎంజాయ్ చేసేంత లేదు.

తెలుగుబులెటిన్.కామ్ రేటింగ్: 2.25/5