హైదరాబాద్ లో పరువు హత్య.. అల్లుడిని చంపించిన మామ

పరువుకు మరో యువకుడు బలైపోయాడు. తన కుమార్తెను ప్రేమించి పెళ్లి చేసుకున్నాడనే కోపంతో ఓ మామ తన అల్లుడినే మట్టుబెట్టించాడు. మిర్యాలగూడకు చెందిన మారుతిరావు తన కుమార్తె అమృత వివాహం చేసుకున్న ప్రణయ్ ను చంపించిన ఘటన తరహాలోనే ఇది కూడా జరిగింది.

హైదరాబాద్ గచ్చిబౌలికి చెందిన లక్ష్మారెడ్డి.. తన కుమార్తె అవంతికను ప్రేమించి పెళ్లి చేసుకున్నాడనే కోపంతో అల్లుడు హేమంత్ ను కిడ్నాప్ చేయించి హత్య చేయించాడు. చందానగర్ కు చెందిన హేమంత్.. తన ఇంటి సమీపంలో ఉండే అవంతిక ఎనిమిదేళ్లుగా ప్రేమించుకుంటున్నారు. ఇరువురిదీ వేర్వేరు కులాలు కావడంతో అవంతిక తల్లిదండ్రులు వారి పెళ్లికి అంగీకరించలేదు. ఆమెను ఇంట్లోనే నిర్బంధించి పెళ్లి సంబంధాలు చూస్తున్నారు. ఈ క్రమంలో అవంతిక ఇంటి నుంచి బయటకు వచ్చేసి ఈ ఏడాది జూన్ 10న గుడిలో వివాహం చేసుకున్నారు.

అనంతరం గచ్చిబౌలి టీఎన్ జీవో కాలనీలో నివాసం ఉంటున్నారు. తన కుమార్తెను పెళ్లి చేసుకున్నాడనే కారణంతో లక్ష్మారెడ్డి అల్లుడిపై కక్ష పెంచుకున్నాడు. ఈ క్రమంలో గురువారం మధ్యాహ్నం అవంతిక మేనమామ యుగేంధర్ రెడ్డి మరికొంతమందితో కలిసి అవంతిక వద్దకు వచ్చాడు. ఇరువురినీ బలవంతంగా తీసుకెళ్లేందుకు ప్రయత్నించారు.

అదే సమయంలో అవంతికను ఇంటికి తీసుకెళ్తామని నమ్మించారు. దీంతో వారి వెంట వెళ్లేందుకు ఇరువురూ అంగీకరించి కారెక్కారు. అయితే, ఇంటి వైపు కాకుండా మరో రూట్ లో తీసుకెళ్లడంతో అనుమానం వచ్చి ఇద్దరూ కారు నుంచి బయటకు దూకేశారు. దీంతో ఆమె మేనమామ తదితరులు హేమంత్ ను వెంబడించి పట్టుకున్నారు. అవంతికను అక్కడే వదిలేసి హేమంత్ ను ఒక్కడినే కొట్టుకుంటూ కారులో బలవంతంగా ఎక్కించుకుని తీసుకెళ్లిపోయారు.

దీంతో తీవ్ర ఆందోళనకు లోనైన అవంతిక.. వెంటనే 100కి డయల్ చేసి పోలీసులకు ఫిర్యాదు చేసింది. దీంతో పోలీసులు సమీప ప్రాంతాల్లో గాలించగా సంగారెడ్డి జిల్లా కిష్టాయిగూడెం శివార్లలో హేమంత్ మృతదేహం లభ్యమైంది. తన మేనమామే తన భర్తను హత్య చేశాడని, ఈ హత్యలో ప్రమేయం ఉన్న ఏ ఒక్కరినీ వదిలిపెట్టొద్దని అవంతిక స్పష్టంచేశారు. కుమార్తె ప్రేమను కాదని, అల్లుడిని చంపించిన మారుతీరావు చివరకు ఆత్మహత్య చేసుకోవాల్సి వచ్చింది. ఇవన్నీ చూసి కూడా లక్ష్మారెడ్డి అలాంటి ఘాతుకానికే తెగబడటం గమనార్హం.