కరోనా స్వైరవిహారం.. ఐదు లక్షలు దాటిన కేసులు

దేశంలో కరోనా మహమ్మారి స్వైర విహారం చేస్తోంది. రోజురోజుకూ కేసుల సంఖ్య పెరుగుతూనే ఉంది. లాక్ డౌన్ ఎత్తివేయడం.. దాదాపు అన్ని రకాల కార్యకలాపాలకూ అనుమతి ఇవ్వడంతో ఈ పరిస్థితి నెలకొంది. చాలామంది సరైన జాగ్రత్తలు తీసుకోకపోవడం కూడా ఇందుకు మరో కారణం. కరోనాకు మందు వచ్చేసింది.. ఇక ఏమీ కాదులే అనే నిర్లక్ష్యం కూడా కొందరిలో కనిపిస్తుండటం గమనార్హం. ఈ నేపథ్యంలో గత 24 గంటల్లో ఏకంగా 18,552 కేసులు నమోదు కావడంతో దేశంలో పాజిటివ్ కేసుల సంఖ్య 5,08,953కి చేరింది.

ప్రస్తుతం కేసులు రెట్టింపు కావడానికి 20 రోజుల సమయం పడుతోంది. లక్ష నుంచి రెండు లక్షలు కావడానికి 14 రోజులు పట్టగా.. రెండు లక్షల నుంచి రెట్టింపు కావడానికి 18 రోజులు పట్టింది. దేశంలో రోజుకు నమోదయ్యే కేసుల్లో సగం కేసులు కేవలం పది నగరాలు, జిల్లాల నుంచే వస్తుండటం ఆందోళన కలిగిస్తోంది. ఆ పదింటిలో హైదరాబాద్, రంగారెడ్డి కూడా ఉన్నాయి. ఇక దేశవ్యాప్తంగా ఇప్పటివరకు 15,700 మంది కరోనాతో మృత్యువాత పడ్డారు. తెలుగు రాష్ట్రాల్లో కూడా కరోనా కల్లోలం సృష్టిస్తోంది.

ముఖ్యంగా తెలంగాణలో ఈ మహమ్మారి మరింతగా విజృంభిస్తోంది. రోజుకు దాదాపు వెయ్యి కేసులు నమోదు కావడం ఆందోళన రేకెత్తిస్తోంది. మరోవైపు ప్రపంచవ్యాప్తంగా కరోనా కేసులు సంఖ్య కోటికి చేరుతోంది. ప్రస్తుతం దాదాపు 99,19,000 కేసులున్నాయి. ఇందులో దాదాపు సగం కేసులు అమెరికా, బ్రెజిల్, రష్యా, భారత్ లలోనే ఉండటం గమనార్హం.