కరోనాకి అన్ లాక్.. కేసులు పైపైకి..!

కరోనా మహమ్మారిని ఎదుర్కోవడానికి దేశవ్యాప్తంగా విధించిన లాక్ డౌన్ కాలంలో కేసుల సంఖ్య ఏ మాత్రం తగ్గలేదు. జాన్ బీ.. జహాన్ బీ అనే నినాదంతో ఆర్థిక వ్యవస్థను కాపాడుకునేందుకు లాక్ డౌన్ కొనసాగిస్తూనే పలు సడలింపులు ఇస్తూ వచ్చారు. ఫలితంగా ఐదో లాక్ డౌన్ ప్రవేశించే సమయానికి దాదాపుగా అన్ని కార్యకలాపాలు యథావిధిగా సాగిపోతున్నాయి. ప్రార్థనా మందిరాలు, పాఠశాలలు, రాజకీయ సభలు, సమావేశాలు మినహా అన్నంటికీ అనుమతి ఇచ్చేశారు. ఈనెల 8 నుంచి అన్ లాక్-1లో భాగంగా ప్రార్థనా మందిరాలు తెరుచుకోవడానికీ వెసులుబాటు కల్పించారు.

కొన్ని రాష్ట్రాలు మినహా చాలా రాష్ట్రాలు అంతర్రాష్ట్ర రాకపోకలకూ ఓకే చెప్పేశాయి. విమానాలు, రైళ్ల రాకపోకలూ షురూ అయ్యాయి. ఆర్టీసీ బస్సులు కూడా నడుస్తున్నాయి. దీంతో అటు కేసుల సంఖ్య కూడా పెరుగుతోంది. రోజురోజుకూ దేశవ్యాప్తంగా పాజిటివ్ కేసులు పైపైకి వెళ్తున్నాయి.

గత 24 గంటల వ్యవధిలో దేశంలో ఏకంగా 8,392 కేసులు నమోదయ్యాయి. 230 మంది మృతి చెందారు. దీంతో దేశంలో కేసుల సంఖ్య 1,90,535కి చేరింది. ఇదే ఒరవడి కొనసాగితే మరో రోజులోనే భారత్ లో కేసులు 2 లక్షలకు చేరుకుంటాయి. ప్రస్తుతం కేసులపరంగా భారత్ ఏడో స్థానంలో ఉంది. ఇక తెలుగు రాష్ట్రాల్లోనూ రికార్డు స్థాయిలో కరోనా కేసులు నమోదవుతున్నాయి. ఆదివారం ఒక్కరోజే తెలంగాణలో 199 కేసులు నమోదు కావడం సంచలనంగా మారింది. ఇప్పటివరకు ఈ స్థాయిలో ఇక్కడ కేసులు నమోదు కాలేదు. ఏపీలోనూ కరోనా కేసుల ఉధృతి కొనసాగుతోంది. గత 24 గంటల్లో 104 మందికి పాజిటివ్ గా నిర్దారణ అయింది. దీంతో అన్ లాక్ కోసం ప్రభుత్వాలు తీసుకుంటున్న చర్యలు కరోనా కేసులు పెరగడానికి సానుకూలంగా మారినట్టయింది.

ఇప్పటికే ఈ స్థాయిలో కేసులు పెరుగుతున్న నేపథ్యంలో పూర్తిస్థాయి అన్ లాక్ అమల్లోకి వస్తే పరిస్థితి ఎలా ఉంటుందో అని సర్వత్రా ఆందోళన వ్యక్తమవుతోంది. హెర్డ్ ఇమ్యూనిటీ పెంచడం కోసమే అన్ లాక్ చర్యలు తీసుకుంటున్నారనే వాదన వినిపిస్తున్నప్పటికీ.. అది అంత వరకు వర్కవుట్ అవుతుందో స్పష్టంగా చెప్పలేని పరిస్థితి ఉంది. ఈ నేపథ్యంలో ఈ నెల 8 నుంచి పరిస్థితులు ఎలా ఉంటాయో వేచి చూడటం మినహా చేసేదేమీ లేదు. ఎవరి జాగ్రత్తల్లో వారు ఉండటం తప్ప..!