ప్రమాదంలో పదమూడన్నర కోట్ల మంది ఉద్యోగాలు?

ప్రపంచాన్ని బేజారెత్తిస్తున్న కరోనా మహమ్మారి కారణంగా ఓ వైపు ప్రజల ప్రాణాలకు ముప్పు పొంచి ఉండగా.. మరోవైపు కోట్లాది మంది ఉద్యోగాలు కూడా ప్రమాదంలో పడనున్నాయా? భారత్ లో నిరుద్యోగిత రేటు మరింత పెరగనుందా? ప్రముఖ సంస్థ ఆర్థర్ డి లిటిల్ అధ్యయనం ఔననే అంటోంది.

కరోనా వైరస్ భారత ఆర్థిక వ్యవస్థపై ఎలాంటి ప్రభావం చూపుతుందో అనే అంశంపై ఆ సంస్థ ఓ అధ్యయనం నిర్వహించింది. భారత్ లో దాదాపు 13.5 కోట్ల మంది ఉద్యోగాలు కోల్పోయే ప్రమాదం ఉందని అంచనా వేసింది. ప్రస్తుతం 7.6 శాతంగా ఉన్న నిరుద్యోగిత రేటు ఏకంగా 35 శాతానికి పెరుగుతుందని పేర్కొంది. మొత్తమ్మీద 17.4 కోట్ల మంది ఉపాధి కోల్పోతారని వివరించింది. ఇది ప్రజల ఆదాయ, వ్యయాలు, పొదుపుపై తీవ్ర ప్రభావం చూపిస్తుందని తెలిపింది. ఈ కారణాలతో దాదాపు 12 కోట్ల మంది పేదరికంలోకి జారిపోతారని, వారిలో 4 కోట్ల మంది అత్యంత దీన స్థితిని ఎదుర్కొనే ప్రమాదం ఉందని హెచ్చరించింది.

భారత ఆర్థిక వ్యవస్థ ఏకంగా లక్ష కోట్ల డాలర్ల మేర నష్టపోయే ప్రమాదం ఉందని, దీనిని నివారించేందుకు తక్షణమే చర్యలు తీసుకోవాల్సిన ఆవశ్యకతను ఆ నివేదిక ప్రస్తావించింది. భారత ఆర్థిక వ్యవస్థ రికవరీ ఆంగ్ల అక్షరం ‘డబ్ల్యూ’ ఆకారంలో ఉంటుందని అంచనా వేసింది. అంటే భారత ఆర్థిక వ్యవస్థ గ్రాఫ్ ‘డబ్ల్యూ’ ఆకారంలో ఉండనుందన్న మాట.

ప్రస్తుతం తీవ్ర నష్టాల్లోకి వెళ్లిపోయిన ఆర్థిక వ్యవస్థ.. ఒక్కసారిగా మళ్లీ పైకి ఎగుస్తుంది. అంతా సర్దుకుందిలే అని భావించే లోపే మళ్లీ కిందకు పడిపోతుంది. అనంతరం పైకి వెళ్తుంది. దీనినే ‘డబ్ల్యూ’ ఆకార రికవరీ అని పిలుస్తారు. 1980లో అమెరికా ఇదే విధమైన పరిస్థితి చవిచూసింది. ఆర్థిక సంక్షోభం కారణంగా పాతాళానికి పడిపోయిన అగ్రరాజ్య ఆర్థిక స్థితి, ఏడాదిలోపే పుంజుకుని పైకి ఎగిసింది. మళ్లీ 1981-82లో మరోసారి ఆర్థిక సంక్షోభంలో కూరుకుపోయింది. ప్రస్తుతం భారత్ కూడా అదే విధమైన పరిస్థితిలో ఉంటుందని ఆర్థర్ డీ లిటిల్ సంస్థ అంచనా వేసింది.

అయితే, ఆర్థికంగా భారత ప్రభుత్వం చేపట్టిన చర్యలు బాగున్నాయని.. ఆత్మ నిర్భర భారత్ పేరిట ప్రకటించిన ప్యాకేజీ సత్పలితాలు ఇచ్చే అవకాశం ఉందని పేర్కొంది. అలాగే ‘మేకిన్ ఇండియా’ నినాదంతో ముందుకెళ్తున్న భారత్.. ప్రపంచవ్యాప్తంగా ఉన్న అవకాశాలను అందిపుచ్చుకోవడానికి ఇదే సరైన తరుణమని పేర్కొంది. అలా చేయడంలో సఫలమైతే 135 కోట్ల జనాభా భవితవ్యం భద్రంగా ఉంటుందని వెల్లడించింది.