హతవిధీ: అటు రాజకీయం.. ఇటు సోషల్ మీడియా పైత్యం

సంక్షోభాల నుంచి అవకాశాలు అందిపుచ్చుకోవాలని చెబుతుంటారు. ఇది నూటికి నూరు శాతం కరెక్టే. కానీ ఆంధ్రప్రదేశ్ లో దీనిని రాజకీయాలకూ అన్వయంచడమే దురదృష్టకరం. కరోనా వంటి విపత్కర సమయంలోనూ అధికార, ప్రతిపక్షాల మధ్య విమర్శలు, ప్రతివిమర్శలూ చోటుచేసుకున్నాయి. తాజాగా విశాఖ విషవాయువు సందర్భంగానూ ఒకరిపై మరొకరు విమర్శలు, ఆరోపణలు చేసుకుంటున్నారు.

భోపాల్ గ్యాస్ దుర్ఘటన వంటి పీడకలను గుర్తుకుతెచ్చేలా జరిగిన ఈ సంఘటన విశాఖ ప్రజల్లోనే కాకుండా అందరినీ భయాందోళనలకు గురిచేస్తుండగా.. పార్టీలు మాత్రం రాజకీయాలు చేయడానికే ప్రాధాన్యత ఇవ్వడం నిజంగా శోచనీయం. ఓ వైపు విశాఖలో పరిస్థితులు ఘోరంగా ఉండగా.. మరోవైపు ఈ ప్రమాదం వెనుక కుట్ర కోణం ఉందంటూ అధికార పార్టీ ఆరోపణలు ప్రారంభించారు.

విశాఖకు రాజధాని తరలింపు ఇష్టం లేకపోవడం వల్ల, ఆ ప్రాంతం సురక్షితం కాదని నిరూపించేందుకు ఇలాంటి కుట్రకు తెగబడి ఉంటారనే ఆరోపణలు వినిపిస్తున్నాయి. ఇలాంటి సమయంలో ఈ ఆరోపణలు ఎంతమాత్రం సమంజసం కాదనే అభిప్రాయాలు వ్యక్తమవుతున్నాయి.

ఇక రాజకీయాలు ఇలా సాగుతుండగా.. సోషల్ మీడియాలో పైత్యం మరీ ఎక్కువైపోయింది. అధికార, విపక్షాలకు చెందిన సోషల్ మీడియా సైన్యం ఒకరిపై మరొకరు దారుణమైన వ్యాఖ్యలతో విరుచుకుపడుతున్నారు. సోషల్ మీడియా అంటేనే అనుచిత పోస్టులు, మార్ఫ్ డ్ ఫొటోలు ఎక్కువగా ఉంటాయనేది అందరికీ తెలిసిన విషయమే.

తాజాగా విశాఖ విషవాయువు ఘటనను కూడా ప్రాంతీయ భేదాలు రెచ్చగొట్టడానికి వినియోగిస్తున్నారు. అమరావతి రాజధానిగా ఉండకుండా కుట్ర పన్నిన వైజాగ్ వాసులకు ఇలాగే కావాలంటూ కొన్ని పోస్టులు చక్కర్లు కొట్టాయి.

అయితే, అదంతా కుట్ర అని టీడీపీ జాతీయ కార్యదర్శి లోకేశ్ స్పష్టంచేశారు. అది మార్ఫ్ డ్ పోస్టని పేర్కొన్నారు. ఆ ట్విట్టర్ అకౌంట్ నేమ్ లో 15 అక్షరాలకు మించి ఉండటమే ఇందుకు నిదర్శనమని.. ట్విట్టర్ అకౌంట్ యూజర్ నేమ్ 15 అక్షరాలకు మించి ఉండదనే విషయం కూడా ఆ పేటీఎం బ్యాచ్ కు తెలియదని ఎద్దేశా చేశారు.

మొత్తానికి విషాద సమయంలోనూ అటు రాజకీయంగానూ, ఇటు సోషల్ మీడియాలోనూ ఇలాంటి పరిస్థితులు నెలకొనడం మంచిది కాదని పలువురు పేర్కొంటున్నారు.