దేశానికి కరోనా ముప్పు.. అసలు కథ ఇప్పుడే మొదలు.!

దేశంలో కరోనా పాజిటివ్‌ కేసుల సంఖ్య 50 వేలకు చేరుకుంటోంది. ఈ రోజు 50 వేలు దాటేయనుంది కూడా. మరోపక్క, ‘పరిస్థితి అదుపులోనే వుంది’ అని కేంద్రం చెబుతోంది. 135 కోట్ల మంది భారతీయులున్న మన దేశంలో 50 వేల కరోనా పాజిటివ్‌ కేసులంటే లెక్కల్లోకి తీసుకోవాల్సిన విషయం కాదు. కానీ, కరోనా పాజిటివ్‌ కేసుల సంఖ్య పెరుగుతున్న తీరు చూస్తోంటే, ఎట్టి పరిస్థితుల్లోనూ కరోనా వైరస్‌ని ఉపేక్షించడానికి వీల్లేదు, ఇంకా కరినమైన చర్యలు తీసుకోవాలన్న భావన కలుగుతుంది.

దేశంలో ఒక రాష్ట్రం నుంచి ఇంకోరాష్ట్రానికి వలస కూలీల్ని తరలించే క్రమంలో ఇబ్బందులు ఎదురవుతున్నాయి. ఆ ఇబ్బందులు ఓ పక్క, వారి కారణంగా కరోనా వ్యాప్తి ఇంకోపక్క.. వెరసి, ఇదో కొత్త తలనొప్పిగా మారింది.

ఆంధ్రప్రదేశ్‌నే తీసుకుంటే, ఇతర రాష్ట్రాల్లో ఇన్ని రోజులూ చిక్కుకుపోయి, ఇప్పుడే స్వరాష్ట్రానికి వస్తున్నవారిలో కరోనా పాజిటివ్‌ కేసులు వెలుగు చూస్తున్నాయి. 20కి పైగా ఈ కేసులు నమోదయినట్లు తెలుస్తోంది.. ఇదీ రెండు రోజుల్లోనే. ఈ లెక్కన ప్రతి రాష్ట్రానికీ ఈ సమస్య తప్పదు.

దేశంలో ఒక చోట నుంచి ఇంకో చోటకి జనం తరలి వెళితేనే పరిస్థితులు ఇలా వుంటే, ఇతర దేశాల నుంచి రానున్న భారతీయుల మాటేమిటి.? గల్ప్‌ దేశాల నుంచి దాదాపు 5 లక్షల మంది స్వదేశానికి రావాలనుకుంటున్నారు. ఇవి కాక, అమెరికా సహా పలు దేశాల్లోని భారతీయుల్లోనూ చాలామంది స్వదేశానికి వచ్చేందుకు ప్రయత్నిస్తున్న విషయం విదితమే. మే 7వ తేదీ నుంచే, విదేశాల నుండి భారతీయుల్ని తీసుకురానున్న దరిమిలా.. దేశానికి కరోనా ముప్పు ముందు మరింత పెరగనుందన్నమాట.

ఇప్పుడు చూస్తోన్న ఈ 50 వేల కరోనా పాజిటివ్‌ కేసులు రెట్టింపవడానికి కేవలం కొద్ది రోజుల సమయమే పట్టినా ఆశ్చర్యపోనక్కర్లేదు. ఆ తర్వాత అది ఎక్కడిదాకా పెరిగి, ఎలాంటి వైపరీత్యం అనంతరం అదుపులోకి వస్తుందో తలచుకుంటేనే ఒకింత ఆందోళన కలగకమానదు ఎవరికైనా.