అబ్జర్వేషన్‌: టీడీపీకి జవసత్వాలు అందిస్తున్న వైఎస్సార్సీపీ

‘60 – 40’ వాటాల వ్యవహారం వైఎస్సార్సీపీ – టీడీపీ మధ్య ఇంకాస్త బలంగానే నడుస్తున్నట్లుంది. లేకపోతే, కరోనా వైరస్‌ కరాళ నృత్యం చేస్తున్న వేళ అధికార వైఎస్సార్‌ కాంగ్రెస్‌ పార్టీ, ప్రతిపక్షం తెలుగుదేశం పార్టీ దిక్కుమాలిన రాజకీయాలు చేయడమేంటి.? పనిగట్టుకుని టీడీపీని వైసీపీ నేతలు, మరీ ముఖ్యంగా మంత్రులు చేయడం చూస్తోంటే, టీడీపీకి మళ్ళీ జవసత్వాలు వచ్చేలా చేయాలని వైఎస్సార్సీపీ కంకణం కట్టుకుందేమో అన్పించకమానదు.

మరోపక్క, అధికార పార్టీ అత్యుత్సాహంతో ఉప్పొంగిపోతూ, టీడీపీ నేతలు మరింతగా చెలరేగిపోతున్నారు. దాంతో, రాష్ట్రంలో కరోనా మహమ్మారి సృష్టిస్తున్న పెను విధ్వంసం ప్రజలకు కనిపించకుండా చేయాలనే టీడీపీ – వైసీపీ కుట్ర విజయవంతంగా కొనసాగడానికి వీలు ఏర్పడిందనే చర్చ సర్వత్రా జరుగుతోంది. కరోనా వైరస్‌ వికృత రూపం దాల్చుతున్నా అధికార పార్టీ నేతలు నిర్లజ్జగా ర్యాలీలు నిర్వహిస్తూ ప్రజల ప్రాణాలతో చెలగాటమాడుతున్న వైనం, ఈ వ్యవహారంపై టీడీపీ చేస్తున్న పబ్లిసిటీ స్టంట్లు.. కొత్త అనుమానాలకు తావిస్తున్నాయి.

రాజకీయాల ఊసు లేకుండా ప్రజల్లోకి జనసేన పార్టీ వెళుతున్న వైనం, గ్రామ స్థాయిలో జనసేన నేతలు, కార్యకర్తలు పేదల్ని ఆదుకునేందుకు చేపడుతున్న సేవా కార్యక్రమాలు ఇటు వైఎస్సార్‌ కాంగ్రెస్‌ పార్టీకీ అటు తెలుగుదేశం పార్టీకీ మింగుడుపడ్డంలేదు. ప్రభుత్వ సొమ్ముతో అధికార పార్టీ నేతలు పబ్లిసిటీ స్టంట్లు చేస్తోంటే, తెలుగుదేశం పార్టీ ‘సేవా గుణం’ పెద్దగా ఎక్కడా కన్పించకపోవడం ఆ పార్టీ వర్గాల్నే విస్మయానికి గురిచేస్తోంది.

ఈ నేపథ్యంలో వైసీపీ – టీడీపీ కలిసి వింత నాటకానికి తెరలేపాయని రాజకీయ విశ్లేషకులు అభిప్రాయపడుతున్నారు. ప్రభుత్వ వైఫల్యాల్ని ఎత్తి చూపుతున్నట్లుగా నటిస్తూ, నానా యాగీ చేయడం టీడీపీ వంతు.. అడ్డగోలు విమర్శలతో టీడీపీకి మైలేజ్‌ తీసుకురావడం వైసీపీ వంతు.. వెరసి రాష్ట్రంలో వైసీపీ – టీడీపీ గేమ్ 60 – 40 ఈక్వేషన్‌ని గుర్తుకు తెలుస్తోంది.