7 రోజులు.. 1700 కిలోమీటర్లు: కరోనా చేయించిన సాహసమిది

కన్నతల్లి కంటే జన్మభూమి గొప్పదంటారు. పొట్ట చేతబట్టుకుని ఎక్కడికెళ్లినా.. శేష జీవితం గడపడానికి మాత్రం సొంతూరికి వెళ్లిపోవడానికే ఎక్కువ మంది మక్కువ చూపిస్తుంటారు. జన్మభూమిపై ఉండే మమకారం అలాంటిది మరి. తాజాగా కరోనా విలయ తాండవం సృష్టిస్తున్న తరుణంలో లాక్ డౌన్ కారణంగా ఉపాధి కోల్పోయిన పలువురు సొంతూళ్లకు వెళ్లిపోవడానికే ప్రయత్నాలు చేశారు.

మొన్న ఢిల్లీలో.. నిన్న ముంబైలో వేలాది మంది వలస కార్మికులు తమను స్వస్థలాలకు పంపించాలంటూ ఆందోళనలు చేసిన సంగతి తెలిసిందే. లాక్ డౌన్ పొడిగించడం.. ఎప్పటికి దీనికి ముగింపు పడుతుందో చెప్పలేకపోవడం ఒక కారణమైతే, లాక్ డౌన్ ముగిసిన తర్వాత పరిస్థితి ఎలా ఉంటుందో తెలియకపోవడం మరో కారణం. అందుకే ఎక్కడో అష్టకష్టాలు పడేకంటే కలో గంజో తాగుతూ సొంతూళ్లేనే ఉందామనే భావనే వారితో అలా ఆందోళన చేయించింది. బతుకుతెరువు కోసం ముంబై వెళ్లిన ఓ ఒడిశా యువకుడు.. లాక్ డౌన్ నేపథ్యంలో సొంతూరికి వెళ్లడానికి సాహసమే చేశాడు. ఏకంగా 1700 కిలోమీటర్లు సైకిల్ తొక్కాడు.

ఒడిశాలోని బిచిత్రాపూర్ కు చెందిన మహేశ్ జెనా అనే యువకుడు ముంబై సాంగ్లిలోని ఓ స్టీల్ ఫ్యాక్టరీలో నెలకు రూ.15వేల వేతనానికి పనిచేస్తున్నాడు. లాక్ డౌన్ కారణంగా ఫ్యాక్టరీ మూసేశారు. మూడు నెలల వరకు తెరిచేది లేదని, అప్పటివరకు రావొద్దని యాజమన్యానం చెప్పేసింది. మూడు నెలలపాటు అక్కడ ఉండాలంటే ఇంటి అద్దె తదితరాలకు రూ.30 వేలు వెచ్చించాల్సిందే. కానీ మహేశ్ వద్ద మూడు వేలు మాత్రమే ఉన్నాయి. వారం రోజులపాటు అక్కడే ఉన్నాడు. ఇక అలా ఉండటం కష్టమని భావించాడు. ఇంటికి వెళ్లిపోదామని నిర్ణయించుకున్నాడు. బస్సులు, రైళ్లు లేకపోవడంతో తన దగ్గరున్న సైకిల్ పై వెళ్లాలని సాహసోపేత నిర్ణయం తీసుకున్నాడు.

ఏప్రిల్ ఒకటో తేదీన ప్రయాణం ప్రారంభించాడు. ముంబై నుంచి హైదరాబాద్, విజయవాడ, విశాఖపట్నం మీదుగా ఒడిశా చేరాడు. నాలుగు రాష్ట్రాలు, ఏడు రోజులు, 1700 కిలోమీటర్లు ప్రయాణించాడు. రోజూ తెల్లవారుజామునే ప్రయాణం ప్రారంభించడం.. మధ్యాహ్నానికి ఏ దాబా దగ్గరో ఆగడం.. మళ్లీ సాయంత్రం కాస్త ఎండ తగ్గగానే సైకిల్ తొక్కడం.. ఇదీ అతడి దినచర్య. మొత్తానికి ఏడు రోజుల తర్వాత ఊరికి చేరగా.. స్థానికులు అతడిని అడ్డుకున్నారు. పరీక్షల నిమిత్తం క్వారంటైన్ కేంద్రానికి తరలించారు. ప్రస్తుతం అక్కడే ఉన్నాడు.