ఇన్‌సైడ్‌ స్టోరీ: విశ్వసనీయత కోల్పోతున్న ‘మీడియా’ సంస్థలు.!

సమాజానికేమో నీతులు చెబుతారు.. సొంత ఉద్యోగుల వెతల్ని పట్టించుకోరు.! ఇదీ కొన్ని ప్రధాన మీడియా సంస్థల యాజమాన్యాల తీరు. పత్రిక లేదా ఛానెల్‌ని నడపడమంటే ఆషామాషీ వ్యవహారం కాదిప్పుడు. ఆ విషయం అందరికీ తెల్సిందే. పత్రిక ప్రింటింగ్‌ ఖర్చుకీ, అమ్మకం ఖర్చుకీ పొంతనే వుండదనీ.. దాదాపుగా ప్రతి పత్రికా నష్టాల్లోనే నడుస్తోందనీ మీడియా సంస్థల యాజమాన్యాలు చెబుతుంటాయి.

మరి ప్రకటనల మాటేమిటి.? ప్రకటనలొక్కటేనా.! ఆయా రాజకీయ పార్టీల తరఫున అనుకూల కథనాలు వండి వడ్డించడం ద్వారా దక్కే ‘ప్రయోజనాల’ మాటేమిటి.? చాలామంది సీనియర్‌ జర్నలిస్టులు తెలుగు మీడియా రంగంలో చోటు చేసుకుంటున్న కొత్త పోకడలపై అసహనం వ్యక్తం చేస్తున్నారు. ‘మీడియా అంటే సామాజిక బాధ్యతతో కూడుకున్న వ్యవహారం ఒకప్పుడు. కానీ, ఇప్పుడు మీడియా అంటే కేవలం వ్యాపారం మాత్రమే..’ అని అసలు విషయాన్ని కుండబద్దలుగొట్టేస్తున్నారు సీనియర్‌ మోస్ట్‌ జర్నలిస్టులు కొందరు.

ఐదేళ్ళకీ, పదేళ్ళకీ ప్లానింగ్‌ ముందుగా సిద్ధం చేసుకున్న కొన్ని మీడియా సంస్థలు, కరోనా వైరస్‌ బూచి చూపించి ‘కాస్ట్‌ కటింగ్‌’ పేరుతో జర్నలిస్టుల్ని రోడ్డున పడేయడంపై విమర్శలు వెల్లువెత్తుతున్న విషయం విదితమే. ఈ నేపథ్యంలో ఆయా మీడియా సంస్థలు పూర్తిగా విశ్వసనీయతను కోల్పోతున్నాయి. ‘ఇకపై ఆ మీడియా సంస్థలు మనుగడ సాధించడం అసాధ్యం. కష్ట కాలంలో జర్నలిస్టుల్ని రోడ్డున పడేయడం అనైతికం..’ అని ఓ బాధిత సీనియర్‌ జర్నలిస్టు సోషల్‌ మీడియా వేదికగా వాపోతున్నారంటే పరిస్థితి తీవ్రతను అర్థం చేసుకోవచ్చు.

‘కొత్త తరం జర్నలిస్టులు తక్కువ ఖర్చుకే దొరకవచ్చుగాక.. ఆయా రాజకీయ పార్టీలకు అనుకూలంగా కథనాలు వండి వార్చడంలో వాళ్ళు సిద్ధహస్తులై వుండొచ్చుగాక.. కానీ, ఈ కొత్త విధానం జర్నలిజం విలువలకి వెన్నుపోటు పొడవడమే’ అంటున్నారు చాలామంది సీనియర్‌ జర్నలిస్టులు. ‘అందుకే జనం సోషల్‌ మీడియా వైపు మొగ్గు చూపుతున్నారు.. ఇకపై రెగ్యులర్‌ మీడియాకి జనంలో అస్సలేమాత్రం విశ్వసనీయత వుండదు’ అంటోన్న కొందరు సీనియర్‌ జర్నలిస్టుల వాదనని ఎలా కొట్టి పారేయగలం.?

‘నిజాన్ని నిర్భయంగా చెప్పే అవకాశం రెగ్యులర్‌ మీడియాలో లేకపోవడంతోనేనేమో.. వెబ్‌ మీడియా కావొచ్చు.. ఇతర ప్లాట్‌ఫామ్స్ లో కావొచ్చు.. తాము చెప్పదలచుకున్నది చెబుతున్నారు..’ అన్నది మెజార్టీ జర్నలిస్టుల అభిప్రాయంగా కన్పిస్తోంది.