సరిలేరు బుల్లితెర రికార్డును వైకుంఠపురం కొట్టేనా?

సంక్రాంతికి ఢీ అంటే ఢీ అన్నట్లుగా పోటీ పడ్డా అల వైకుంఠపురంలో ఇంకా సరిలేరు నీకెవ్వరు చిత్రాలు రెండు కూడా భారీ విజయాలను దక్కించుకున్న విషయం తెల్సిందే. అయితే అల వైకుంఠపురంలో సినిమా రికార్డు స్థాయి వసూళ్లను దక్కించుకుంది. బన్నీ కెరీర్‌లో మొదటి ఇండస్ట్రీ హిట్‌గా నిలవడంతో పాటు టాప్‌ చిత్రాల జాబితాలో నిలిచి సరిలేరు నీకెవ్వరు చిత్రంపై పై చేయి సాధించింది. ఇలాంటి సమయంలో మరోసారి ఈ రెండు సినిమాల మద్య పోటీ ఏర్పడినది.

ఉగాది కానుకగా బుల్లి తెర ద్వారా ప్రేక్షకుల ముందుకు వచ్చిన సరిలేరు నీకెవ్వరు చిత్రంకు ప్రేక్షకులు బ్రహ్మరథం పట్టారు. లాక్‌ డౌన్‌ ఇతరత్ర కారణాలతో సినిమాకు ఏకంగా 23.4 టీవీఆర్‌ నేటింగ్‌ను ఇచ్చారు. గత 15 ఏళ్లలో సినిమా కూడా ఈ స్థాయిలో టీవీఆర్‌ను దక్కించుకోలేదు అంటూ మహేష్‌బాబు ఫ్యాన్స్‌ అధికారికంగా ప్రకటించారు. ఇక మే 1న అల వైకుంఠపురంలో చిత్రం వైరల్డ్‌ వైడ్‌ టీవీ ప్రీమియర్‌కు రెడీ అయ్యింది.

ఇటీవలే మలయాళంలో ప్రీమియర్‌ అయిన ఈ సినిమాకు మంచి స్పందన వచ్చింది. కనుక ఇక తెలుగులో దుమ్ము రేపడం ఖాయం అంటున్నారు. అల వైకుంఠపురంలో చిత్రం ప్రీమియర్‌ పాతిక నుండి 30 వరకు టీవీఆర్‌ దక్కించుకుంటుందని ఫ్యాన్స్‌ చాలా నమ్మకంగా ఉన్నారు. తప్పకుండా బన్నీ మరోసారి రికార్డు బ్రేకింగ్‌ చేయడం ఖాయం అంటున్నారు. మే 1వ తారీకున సాయంత్రం 6 గంటల 30 నిమిషాలకు ప్రసారం చేయబోతున్నట్లుగా జెమిని టీవీ ప్రకటించింది. రెండు వారాల ముందే ప్రకటించడంతో భారీ పబ్లిసిటీ చేసి రికార్డు స్థాయి టీఆర్‌వీ రాబట్టే ప్రయత్నాలు జరుగుతున్నాయి.