ఈ పరిస్థితుల్లో లాక్‌డౌన్‌ ఎత్తేయడమేంటి జగన్‌.?

ఆంధ్రప్రదేశ్‌లో ఇప్పటికే 400కి పైగా కరోనా పాజిటివ్‌ కేసులు నమోదయ్యాయి. ఆరుగురు ప్రాణాలు కోల్పోయినట్లు అధికారిక లెక్కలు చెబుతున్నాయి. సుమారు 141 రెడ్‌ జోన్లను రాష్ట్ర ప్రభుత్వమే అధికారికంగా ప్రకటించింది. కర్నూలు, గుంటూరు జిల్లాల్లో కరోనా వైరస్‌ తీవ్రత చాలా ఎక్కువగా వుంది. గుంటూరు, కృష్ణా జిల్లాలూ ఇందుకు మినహాయింపేమీ ఆదు. శ్రీకాకుళం, విజయనగరం జిల్లాల్లో మాత్రం ఇంతవరకూ కరోనా వైరస్‌ ‘జాడ’ కన్పించకపోవడం కాస్త ఊరట.

రాష్ట్రం ఇంతటి క్లిష్ట పరిస్థితుల్లో వుంటే, ‘లాక్‌డౌన్‌’ని కేవలం రెడ్‌ జోన్లకే పరిమితం చేయాలని ప్రధాని నరేంద్ర మోడీకి ఆంధ్రప్రదేశ్‌ ముఖ్యమంత్రి వైఎస్‌ జగన్‌ విజ్ఞప్తి చేయడం అందర్నీ విస్మయానికి గురిచేస్తోంది. ‘లాక్‌డౌన్‌’ అంటే ఆషామాషీ వ్యవహారం కాదు. ఆర్థిక వ్యవస్థ కుప్ప కూలిపోతుందనీ తెలిసీ, విధిలేని పరిస్థితుల్లో తీసుకున్న నిర్ణయమది.

తెలంగాణ ముఖ్యమంత్రి కేసీఆర్‌ చెప్పినట్లు, బతికుంటే బలుసాకు తినొచ్చు. ఇక్కడ, రాష్ట్ర ఆర్థిక వ్యవస్థ కంటే, దేశ ఆర్థిక వ్యవస్థ కంటే.. ప్రజలే ముఖ్యం. అందుకే, ప్రపంచంలోని చాలా దేశాలు ఆర్థికంగా నష్టపోయినా ఫర్లేదు.. లాక్‌ డౌన్‌ తప్పనిసరి.. అంటున్నాయి. ఒరిస్సాలో కేసుల సంఖ్య తెలుగు రాష్ట్రాలతో పోల్చితే చాలా చాలా తక్కువగా వున్నప్పటికీ, అక్కడ లాక్‌డౌన్‌ని ఏప్రిల్‌ నెలాఖరు వరకు పొడిగించారు. అక్కడి రాష్ట్ర ప్రభుత్వం, తమ ప్రజల పట్ల చూపుతున్న శ్రద్ధకు నిదర్శనమది. పంజాబ్‌ కూడా ఇదే బాటలో నడుస్తోంది.

తెలంగాణ ముఖ్యమంత్రి కేసీఆర్‌, ‘లాక్‌డౌన్‌ పొడిగించాల్సిందే..’ అని ఇప్పటికే నినదించారు.. ప్రధాని దృష్టికి ఈ రోజు ఇంకోసారి తన అభిప్రాయాన్ని తీసుకెళ్ళారు. కరోనా వైరస్‌, ఆంధ్రప్రదేశ్‌లో అదుపు చేయలేని స్థాయిలోనే వుంది. లేకపోతే, ఇంకా రాష్ట్రంలో ప్రతిరోజూ 15కి పైగానే కేసులు ఎందుకు నమోదవుతున్నట్లు.? ఈ రోజు ఇప్పటికే 21 కరోనా పాజిటివ్‌ కేసులు నమోదయ్యాయి. లాక్‌డౌన్‌ని ఎత్తివేస్తే.. ఆ తర్వాత జరిగే నష్టానికి ఎవరు బాధ్యత వహిస్తారు.? ముఖ్యమంత్రి బాధ్యతారాహిత్యానికి నిదర్శనమే.. ‘లాక్‌డౌన్‌’ ఎత్తి వేతపై ఆయన వ్యాఖ్యలు.. అంటూ జనబాహుళ్యంలో చర్చ జరుగుతోంది.