హాస్యాస్పదం: నిమ్మగడ్డపై వేటుకి జగన్‌ సర్కార్‌ స్కెచ్‌!

వైఎస్సార్‌ కాంగ్రెస్‌ పార్టీలో ఆ పార్టీ అధినేత వైఎస్‌ జగన్‌ మోహన్‌రెడ్డి నిర్ణయాలకు తిరుగులేదు. ఆయన ఆలోచనల్ని ఎవరైనా వ్యతిరేకిస్తే అంతే సంగతులు. ప్రాంతీయ పార్టీల్లో ఈ పైత్యం సర్వసాధారణమే. కానీ, పార్టీ వేరు.. ప్రభుత్వం వేరు. ప్రభుత్వంలో కూడా తనకు నచ్చినట్లే అధికారులు వుండాలనుకుంటే ఎలా.? తప్పయినా, ఒప్పయినా.. తాను అనుకున్నదే జరగాలనుకుంటే ఎలా.?

ప్రభుత్వ కార్యాలయాలకు పార్టీ రంగుల విషయమై హైకోర్టు మొట్టికాయలేసింది. ప్రభుత్వ స్కూళ్ళలో తెలుగు మాధ్యమాన్ని పూర్తిగా ఎత్తేయాలని ఆలోచన చేస్తే.. అక్కడా హైకోర్టు చెంప ఛెళ్ళుమనిపించేసింది.. మూడు రాజధానుల వ్యవహారం కూడా గందరగోళంలో పడింది. శాసన మండలి రద్దు వ్యవహారంలోనూ పరిస్థితులు అనుకూలంగా కన్పించడంలేదు. ఒకటేమిటి.? తీసుకుంటున్న ప్రతి నిర్ణయమూ వివాదాస్పదమే. అయినాగానీ, తాను పట్టిన కుందేలుకి మూడే కాళ్ళన్నట్లు వ్యవహరిస్తున్నారు వైఎస్‌ జగన్‌ మోహన్‌రెడ్డి.

ఓ పక్క కరోనా వైరస్‌ ప్రపంచాన్ని ముంచెత్తుతున్న వేళ, రాష్ట్రంలో స్థానిక ఎన్నికలు మంచిది కాదంటూ, ఎన్నికల ప్రక్రియను వాయిదా వేస్తున్నట్లు రాష్ట్ర ఎన్నికల ప్రధాన అధికారి నిర్ణయిస్తే.. ఆయనపై ‘కులం’ పేరుతో దూషణలకు దిగారు ముఖ్యమంత్రి వైఎస్‌ జగన్‌. వాయిదా వేయడం సబబు కాదంటూ స్థానిక ఎన్నికలపై జగన్‌ సర్కార్‌ సుప్రీం కోర్టుకి వెళితే, అక్కడా మొట్టికాయలే పడ్డాయి.

ఇక, ఇప్పుడు ఎలాగైనా రాష్ట్ర ఎన్నికల ప్రధాన అధికారి నిమ్మగడ్డ రమేష్‌కుమార్‌ని తొలగించాలన్న ఆలోచన చేస్తోందట వైఎస్‌ జగన్‌ సర్కార్‌. ఈ నేపథ్యంలో ఐదేళ్ళ పదవీ కాలాన్ని మూడేళ్ళకు కుదించేలా కొత్త ఆర్డినెన్స్‌ కోసం ప్రభుత్వం సన్నద్ధమవుతున్నట్లు ప్రచారం జరుగుతోంది. ఇది రాజ్యాంగ విరుద్ధమన్న అభిప్రాయం సర్వత్రా వ్యక్తమవుతోంది. ‘ఎవరేమనుకున్నా డోన్ట్‌ కేర్‌.. నేనింతే..’ అన్నట్లు వ్యవహరిస్తున్న జగన్‌.. అన్నంత పనీ చేసినా ఆశ్చర్యపోనక్కర్లేదు. అయితే, ఇంకోసారి మొట్టికాయ తప్పదా.? అంటే, అలాంటివి ఆయనకు అలవాటైపోయాయ్‌ మరి.!