కరోనా.. రూపు మారుతోందా?

ప్రపంచాన్ని హడలెత్తిస్తున్న కరోనా మహమ్మారి అంతకంతకూ శక్తివంతం అవుతోందా? పరిస్థితులకు తగినట్టుగా అలవాటు పడుతోందా? ప్రస్తుత పరిస్థితులు అలాగే కనిపిస్తున్నాయి. వాస్తవానికి వైరస్ లు ఎప్పటికప్పుడు తన రూపు మార్చుకుంటుంటాయి. పరిస్థితులకు తగినట్టుగా మారుతుంటాయి. తాజాగా కోవిడ్-19 విషయంలో ఆసక్తికరమైన విషయాలు వెలుగుచూస్తున్నాయి.

ఎవరికైనా వైరస్ సోకితే ఆ లక్షణాలు రెండు రోజుల నుంచి 14 రోజుల్లో బయటపడతాయి. కానీ ప్రస్తుతం వైరస్ సోకిన తర్వాత 19 రోజులైనా ఎలాంటి లక్షణాలు బయటపడకపోవడం వైద్యులను ఆశ్చర్యంలో ముంచెత్తింది. కేరళకు చెందిన ఓ విద్యార్ధిని వ్యవహారం ఇప్పుడు ఆందోళనకు గురి చేస్తోంది.

ఢిల్లీలో చదువుకుంటున్న ఆ యువతి గతనెల 17న తన స్వగ్రామానికి వచ్చింది. ఈ సందర్భంగా ఆమెకు కరోనా పరీక్షలు చేయగా పాజిటివ్ అని తేలింది. అయితే, ఆమెకు కరోనా వైరస్ సోకిన తర్వాత 19 రోజులకు కూడా దానికి సంబంధించిన లక్షణాలు జలుబు, తుమ్ములు, దగ్గు, జ్వరం, తలనొప్పి వంటివి ఏవీ లేవు. దీంతో కరోనా వైరస్ రూపు మారుతుందనే అభిప్రాయాలు వ్యక్తమవుతున్నాయి.

ఢిల్లీ ప్రార్థనలకు వెళ్లి వచ్చినవారిలో కూడా కొందరికి ఇలాగే ఉన్నట్టు తెలుస్తోంది. వైరస్ లక్షణాలు కనిపించకపోయినా నలుగురైదుగురికి పాజిటివ్ అని తేలింది. ఇలా లక్షణాలు కనిపించకుండా పాజిటివ్ కేసులు వెలుగచూడటం చాలా ప్రమాదకరమని వైద్యులు చెబుతున్నారు. సాధారణంగా వైరస్ లక్షణాలు కనిపిస్తే వారు హోం క్వారంటైన్ కు పరిమితం అవుతారు. లేదా పరీక్షల కోసం ఆస్పత్రికి వెళతారు. కానీ లక్షణాలు కనిపించకపోతే వారు మామూలుగానే తిరుగుతారు. దీంతో వైరస్ వ్యాప్తి ఎక్కువవుతుంది.

ఈ నేపథ్యంలో ర్యాండమ్ గా కరోనా టెస్టులు చేయాల్సిన అవసరం ఉందని చెబుతున్నారు. ప్రస్తుతం కరోనా లక్షణాలు కనిపించినవారికి, లేదా కరోనా పాజిటివ్ వ్యక్తులతో కాంటాక్ట్ అయినవారికి మాత్రమే పరీక్షలు నిర్వహిస్తున్నారు. ఇకపై లక్షణాలతో సంబంధం లేకుండా అందరికీ పరీక్షలు నిర్వహించాలని, అది కుదరని పక్షంలో కనీసం ర్యాండమ్ గా అయినా కొంతమందికి పరీక్షలు చేయాలని అభిప్రాయపడుతున్నారు.