ప్చ్.. చంద్రబాబు ఎవరికీ పట్టడంలేదా?

లాక్ డౌన్ వేళ తెలుగుదేశం పార్టీ అధినేత చంద్రబాబు పరిస్థితి మరీ ఘోరంగా తయారైంది. లాక్ డౌన్ కు ముందు హైదరాబాద్ వచ్చిన ఆయన.. అక్కడే ఉండిపోయారు. ప్రతిరోజూ మీడియాలో కనపడాలని తపనపడే నేతల్లో బాబు ఎప్పుడూ ముందు వరుసలో ఉంటారనే టాక్ ఉంది. ఏ పని చేసినా దానికి తగిన ప్రచారం చేసుకోవడంతో ఆయన్ను మించినవారు లేరని అంటుంటారు. అలాంటిది కరోనా మహమ్మారి ప్రపంచాన్ని కుదిపేస్తున్న తరుణంలో సహజంగానే ఎవరికీ రాజకీయాలు చేసే పరిస్థితి లేకపోయింది. దీంతో బాబుకు ఏమి చేయాలో తోచడంలేదు.

పైగా అమరావతిలో ఉంటే పార్టీ నేతలతో సమావేశాలో, సమీక్షలో అంటూ ఏదో ఒకటి చేసే వీలు కలిగేది. కానీ హైదరాబాద్ లో ఉండటం వల్ల అది కూడా కుదరడంలేదు. ఈ నేపథ్యంలో ఏదో ఒక అంశంతో మీడియా ముందుకు వస్తున్నారు. విమర్శలకు ఇది సమయం కాదంటూనే ఏపీ సర్కారుపై విరుచుకుపడుతున్నారు. ఓ పక్క ఏపీ సీఎం జగన్ ను విమర్శిస్తున్నా.. మరోవైపు ప్రధాని మోదీని ప్రశంసల్లో ముంచెత్తుతున్నారు.

ఎలాగైనా మళ్లీ ఎన్డీఏ పక్షాన చేరాలని ప్రయత్నాలు చేస్తున్నారు. అయితే, బాబు ఎంతగా చేయి చాపుతున్నా.. మోదీ వైపు నుంచి ఎలాంటి స్పందనా లేదు. కరోనా నియంత్రణ, లాక్ డౌన్ పొడిగింపు వంటి అంశాలపై ప్రధాని అందరి సూచనలు, సలహాలు తీసుకుంటున్నారు. సీఎంలతోపాటు దేశంలోని వివిధ పార్టీలకు చెందిన సీనియర్ నేతలు, మాజీ ముఖ్యమంత్రులతో ఫోన్లో మాట్లాడుతున్నారు. కానీ 40 ఏళ్ల రాజకీయ అనుభవం కలిగిన చంద్రబాబుకు మాత్రం మోదీ నుంచి ఫోన్ రాలేదు. ఇది బాబుకు మరింత ఇబ్బందిగా మారింది.

ఏపీ సీఎం జగన్ తన సలహాలు తీసుకోవాలంటూ ఆయన పదేపదే కోరే పరిస్థితికి వచ్చారు. మనం ఇతరుల పట్ల ఏ విధంగా వ్యవహరిస్తామో, వారు కూడా మన పట్ల అదే విధంగా వ్యవహరిస్తారనే లాజిక్కును బాబు మరచిపోయినట్టున్నారని పలువురు ఎద్దేవా చేస్తున్నారు. ఆయన సీఎంగా ఉన్నప్పుడు ప్రతిపక్ష నేత అభిప్రాయాలను ఎన్నడూ తీసుకుంది లేదు. అలాంటిది ఇప్పుడు ఆయన అభిప్రాయాలు సీఎం తీసుకోవాలని ఎలా ఆశిస్తారని ప్రశ్నిస్తున్నారు. మొత్తానికి ఒకప్పుడు దేశ రాజకీయాల్నే శాసించిన చంద్రబాబు ఇప్పుడు ఎవరికీ పట్టడంలేదనే చర్చ జరుగుతోంది. ఓడలు బండ్లు.. బండ్లు ఓడలు కావడం అంటే ఇదేనేమో.