దేశంలో ‘లాక్‌ డౌన్‌’ ఇంకో మూడు నెలలు.?

క్షణమొక యుగంలా గడుస్తోంది చాలామందికి. వీలైనంత త్వరగా లాక్‌ డౌన్‌ని ఎత్తివేస్తే, తమ తమ విధులకు హాజరు కావాలని చాలామంది ఉద్యోగులు చూస్తున్నారు. రోజు కూలీల పరిస్థితి ఇంకా దారుణంగా వుంది. లాక్‌ డౌన్‌ అంటే ఆషామాషీ వ్యవహారం కాదు మరి. కానీ, ప్రాణం ముందు ఏదైనా చిన్నదే. అలాగని, లాక్‌ డౌన్‌ ఎక్కువ కాలం కొనసాగితే, ప్రభుత్వాలు సరిగ్గా ప్రజల్ని ఆదుకోకపోతే.. కరోనా వైరస్‌ వల్ల జనం చనిపోవడం సంగతి తర్వాత.. ఆకలి చావులు అనూహ్యంగా పెరిగిపోతాయనే చర్చ సర్వత్రా జరుగుతోంది. అందులోనూ నిజం లేకపోలేదు.

ఇప్పటికే అక్కడక్కడా ఈ తరహా ఆకలి చావులు వెలుగు చూస్తున్నాయి కూడా. ‘వారం రోజులకేనా.?’ అని చాలామంది అనుకోవచ్చుగాక.! కానీ, దినసరి కూలీ పరిస్థితేంటి.? ప్రతి రోజూ పనికి వెళితేనే, మూడు పూటలు గడవని దుస్థితి. అలాంటిది, రోజుల తరబడి లాక్‌ డౌన్‌ అంటే అదెంత బాధాకరమైన విషయం.! ‘కంపెనీలు, తమ ఉద్యోగులకు వేతనాలతో కూడిన సెలవులు ఇవ్వాలి..’ అని ప్రభుత్వాలు చెప్పడం సరే, ఆయా కంపెనీలకు ఆ స్థాయిలో ఆర్థిక పరిపుష్టి వుండాలి కదా.! ఇది ఇంకో కీలకమైన సమస్య. చెప్పుకుంటూ పోతే సమస్యలు చాలానే వున్నాయి.

ఆ వెతలు ఇలా వుంటే, దేశంలో పెరుగుతున్న కేసులు, కేంద్ర – రాష్ట్ర ప్రభుత్వాల స్థాయిలో వ్యక్తమవుతున్న అభిప్రాయాలు చూస్తోంటే, ఇంకో మూడు నెలలపాటు లాక్‌ డౌన్‌ కొనసాగే అవకాశాలు లేకపోలేదని తెలుస్తోంది. ఈఎంఐల నుంచి మూడు నెలలపాటు ఉపశమనం అనగానే, అందరికీ ‘ఆ మూడు నెలల నరకం’ ఇప్పుడే గుర్తుకొచ్చేసింది.

ఇదిలా వుంటే, పరిస్థితి ఎంత త్వరగా అదుపులోకి వస్తే.. అంత త్వరగా లాక్‌ డౌన్‌ ఎత్తివేసే అవకాశం వుందన్న చర్చా జరుగుతుండడం గమనార్హం. మనది అభివృద్ధి చెందుతున్న దేశం.. ఎక్కువ కాలం లాక్‌ డౌన్‌ అంటే.. అభివృద్ధి సంగతి దేవుడెరుగు, ఆకలి చావుల దేశంలా మారిపోతుందేమో.!