జగన్ ముందు భారీ సవాళ్లు.. ఎదుర్కొంటాడా? చేతులెత్తేస్తాడా?

వైఎస్ జగన్ అధికారంలోకి వచ్చామన్న ఆనందం కంటే అడుగడుగునా ఎదురౌతున్న సవాళ్ళను ఎలా ఎదుర్కోవాలి అనే బాధ ఎక్కువైంది. 2019 ఎన్నికల్లో ఆ పార్టీకి అఖండ మెజారిటీ ఇచ్చి గెలిపించారు. ఎన్నికల మ్యానిఫెస్టో లో పెట్టిన నవరత్నాలు హామీలను నెరవేర్చేందుకు అన్ని రకాలుగా జగన్ సిద్ధం అయ్యి దానికి తగిన ఏర్పాట్లు చేసుకొని అమలు చేస్తున్నాడు.

ప్రజల ముఖ్యమంత్రిగా అనిపించుకోవడానికి జగన్ చేసిన ప్రయత్నం అంతాఇంతా కాదు. ఆరు నెలల్లోనే జగన్ ప్రజల ముఖ్యమంత్రిగా మెప్పు పొందాడు. అక్కడి నుంచే అసలు కథ మొదలైంది. అప్పటి వరకు రాజధాని విషయంలో సైలెంట్ గా ఉన్న జగన్, మూడు రాజధానుల అంశం తెరమీదకు తీసుకొచ్చారు. దీంతో రాష్ట్రంలో రాజధాని రగడ మొదలైంది. రాజధాని ప్రాంతంలోని రైతులు గొడవలు, ధర్నాలు చేయడం మొదలు పెట్టారు. ఆ గొడవలు ఎలాగోలా సద్దుమణుగుతున్నాయి… రాష్ట్రంలో స్థానిక ఎన్నికల్లో బలం నిరూపించుకుంటే మూడు రాజధానులు ప్రజలు మద్దతు ఇస్తున్నారు అనే సంకేతాలను ప్రజల్లోకి తీసుకెళ్లొచ్చు అనే లోగా కరోనా మహమ్మారి వచ్చిపడింది.

కరోనా రాష్ట్రంలో పెద్దగా లేదు కాబట్టి ఎన్నికలు నిర్వహించేలా చర్యలు తీసుకోవాలని ప్రభుత్వం సుప్రీం కోర్టుకు వెళ్ళింది. కానీ, సుప్రీం కోర్టు కూడా రాష్ట్ర ఎన్నికల కమిషన్ తీసుకున్న నిర్ణయాన్ని సమర్ధించింది. ఆ తరువాతే కథ మొత్తం మారిపోయింది. మార్చి 22 వ తేదీన జనతా కర్ఫ్యూ విధించడం, ఆ తరువాత రాష్ట్రాలు లాక్ డౌన్ చేయడం, ఇండియాను 21 రోజులపాటు లాక్ డౌన్ చేస్తున్నట్టు ప్రధాని మోడీ ప్రకటించడంతో జగన్ ప్రభుత్వం వేసుకున్న ప్లాన్స్ అన్ని రివర్స్ అయ్యాయి. బడ్జెట్ సమావేశాలు లేకుండానే మూడు నెలల కోసం ఓటాన్ బడ్జెట్ ను ప్రవేశపెట్టి ఆర్డినెన్స్ ద్వారా దానిని ఆమోదించుకోవాల్సిన పరిస్థితి వచ్చింది.

ప్రస్తతం రాష్ట్రంలో కరోనా ప్రభావం మిగతా రాష్ట్రాలతో పోల్చుకుంటే పెద్దగా లేదని చెప్పాలి. తెలంగాణలో 59 కేసులుంటే, ఆంధ్రప్రదేశ్ లో 13 కేసులు మాత్రమే నమోదయ్యాయి. మార్చి మొదటివారం నుంచి ఆంధ్రప్రదేశ్ కు విదేశాల నుంచి వచ్చిన వ్యక్తుల సంఖ్య 20 వేలకు పైగా ఉన్నది. విదేశాల నుంచి వచ్చిన వ్యక్తుల ద్వారానే ఈ వైరస్ వ్యాపిస్తుండటంతో వైరస్ ను జగన్ ప్రభుత్వం ఎలా కట్టడి చేస్తుంది అనే దానిపై ఇప్పుడు అందరి దృష్టి ఉన్నది. ఇప్పటి వరకైతే కంట్రోల్ లోనే ఉన్నది. ఇకపై కూడా అలానే ఉంటుందా? జగన్ ప్రభుత్వం కరోనాపై యుద్ధం చేసి గెలుస్తుందా? చూద్దాం.