టీడీపీ నేతలకు సిట్ చుక్కలు.. డొంక కదులుతుందా?

తెలుగుదేశం పార్టీ అధికారంలో ఉన్న ఐదేళ్ళలో జరిగిన అక్రమాలపైన, పాలనా విధానాలపైనా విచారణ జరిపేందుకు సిట్ ను వైకాపా ప్రభుత్వం ఏర్పాటు చేసిన సంగతి తెలిసిందే. సిట్ కు విశేష అధికారాలు కల్పించిన సంగతి కూడా తెలిసిందే. సిట్ కు ఏకంగా పోలీస్ స్టేషన్ హోదా ఇవ్వడంతో తెలుగుదేశం పార్టీ నేతలు షాక్ అవుతున్నారు. ఇదెక్కడి విడ్డూరం అని మండిపడుతున్నారు. ఎవరైనా గుట్టు తెలుసుకోవడానికి న్యాయవిచారణకు ఆదేశిస్తారు. ఇలా సిఆర్పీసీ సెక్షన్ 2 లో మార్పులు చేసి సిట్ కు అధికారం ఇవ్వడం చాలా పెద్ద సాహసంగా చెప్పుకోవాలి.

రంగంలోకి దిగిన సిట్ తెలుగుదేశం పార్టీ నేతలకు చుక్కలు చూపిస్తోంది. మొదట పత్తిపాటి పుల్లారావును అతని బంధుగణాన్ని టార్గెట్ చేసుకుంది. ఇందులో భాగంగానే సిట్ వారిపై ప్రశ్నల వర్షం కురిపించడం మొదలుపెట్టింది. దాదాపుగా నాలుగైదు గంటలపాటు పత్తిపాటిని ప్రశ్నించినట్టుగా తెలుస్తోంది. అలానే పత్తిపాటి పుల్లారావుకు బంధువులను కూడా ప్రశ్నించింది. ప్రశ్నించడమే కాకుండా పత్రాలను, హార్డ్ డిస్క్ లను కూడా స్వాధీనం చేసుకున్నారు.

సిట్ ఈ వివరాలను గోప్యంగా ఉంచినట్టు తెలుస్తోంది. సిట్ రంగంలోకి దిగడంతో తెలుగుదేశం పార్టీ నేతల్లో భయాందోళనలు నెలకొన్నాయి. ఎవర్ని ఎప్పుడు విచారిస్తారో… ఎలా విచారిస్తారో తెలియక భయపడుతున్నారు. కొన్ని రోజుల క్రితం సీఐడీ కూడా వారిని విచారించింది. అలానే ఈడీ కూడా వారిపై దాడులు చేసింది. ఇలా ఒకదాని తరువాత ఒకరుగా దాడులు చేస్తుండటంతో తెలుగుదేశం పార్టీ నేతలు భయపడుతున్నారు. అమరావతి ఇన్సైడర్ ట్రేడింగ్ లో ఉన్న గుట్టు మొత్తాన్ని బయటకు లాగే వరకు జగన్ ప్రభుత్వం విడిచిపెట్టేలా కనిపించడం లేదు.