టీఎస్సార్టీసీ కార్మికులు గెలిచారు.. కేసీఆర్‌ సంగతేంటి.?

పండగ వేళ సమ్మె చేయడం ద్వారా ఆర్టీసీ కార్మికులు ప్రయాణీకుల్ని ఇబ్బందుల్లోకి నెట్టిన మాట వాస్తవం. కానీ, నెల రోజుల ముందే ప్రభుత్వానికి సమ్మె నోటీసు ఇచ్చిన విషయాన్ని కార్మికులు, ప్రజల్లోకి బలంగా తీసుకెళ్ళగలిగారు. దాంతో, ఆర్టీసీ కార్మికుల సమ్మె విజయవంతమయ్యింది. ప్రజలు కూడా తాము ప్రయాణాల పరంగా ఇబ్బందులు పడుతున్నా, కార్మికుల కష్టాల్ని అర్థం చేసుకున్నారు. ఇద్దరు కార్మికుల్ని ఈ సమ్మెలో పోగొట్టుకున్న తెలంగాణ ఆర్టీసీ.. ఎట్టకేలకు ఉపశమనం పొందింది.

‘సెల్ఫ్‌ డిస్మిస్‌..’ అంటూ కార్మికుల్ని వెటకారం చేసిన తెలంగాణ ముఖ్యమంత్రి కేసీఆర్‌, ఇప్పుడు అదే కార్మికులతో చర్చల కోసం దిగి రాక తప్పేలా లేదు. హైకోర్టు తాజా ఆదేశాలతో రాష్ట్ర ప్రభుత్వం, ఆర్టీసీకి ఎండీని ఏర్పాటు చేయడంతోపాటు కార్మికులతో చర్చల్ని ప్రారంభించాల్సి వుంది. ఏ సమస్యకి అయినా చర్చలతో పరిష్కారం లభిస్తుంది.

నిజానికి ఆర్టీసీ కార్మికులేమీ గొంతెమ్మ కోర్కెలు కోరడంలేదు. ఆంధ్రప్రదేశ్‌లో సాధ్యమవుతున్న ఆర్టీసీ విలీనం, తెలంగాణలో ఎందుకు సాధ్యం కాదు.? పోనీ, సాధ్యా సాధ్యాల్ని పరిశీలిస్తామని కూడా తెలంగాణ ప్రభుత్వం చెప్పకపోవడం గమనార్హం. ప్రయాణీకుల కష్టాల్ని తగ్గించేందుకు తాత్కాలిక డ్రైవర్లను వినియోగిస్తున్నట్లు రాష్ట్ర ప్రభుత్వం, హైకోర్టుకి తెలియజేస్తే, అది ప్రజల ప్రాణాలతో చెలగాటమాడటమే కదా.? అని హైకోర్టు ప్రశ్నించింది.

ఎలా చూసినా, రాష్ట్ర ప్రభుత్వానికి ఆర్టీసీ సమ్మె విషయంలో మొట్టికాయలు పడ్డ మాట వాస్తవం. నిజానికి, ఆర్టీసీ కార్మికుల డిమాండ్లలో న్యాయం వుంది.. ప్రభుత్వం వాదనలో పస లేనే లేదు. అది అందరికీ అర్థమవుతున్నా, అధికారంలో వున్నవారికి మాత్రం అర్థం కావడంలేదు. ఆఖరికి టీఆర్‌ఎస్‌ సీనియర్‌ నేత కేశవరావు కూడా, తెలంగాణ ఆర్టీసీ కార్మికుల కష్టాల్ని అర్థం చేసుకున్నారు.

దురదృష్టవశాత్తూ ఆయన గొంతునీ నొక్కేసేందుకు కేసీఆర్‌ ప్రయత్నించారు. మొత్తమ్మీద, మొట్టికాయలు పడ్డాక అయినా, కేసీఆర్‌ తన తీరు మార్చుకుంటారా.? మార్చుకోక తప్పదంతే.