ఇక క్రికెట్ సైతం షా కనుసన్నల్లోనే..!

కేంద్రంలో రెండోసారి అధికారంలోకి రావడమే కాకుండా దేశవ్యాప్తంగా ఒక్కో రాష్ట్రంలో కాషాయజెండా పాతుకుంటూ వస్తున్న బీజేపీ జాతీయ అధ్యక్షుడు, కేంద్ర హోంమంత్రి దృష్టి క్రికెట్ పైనా పడింది. భారత్ లో క్రికెట్ కార్యకలాపాలు చూసే భారత క్రికెట్ నియంత్రణ మండలి (బీసీసీఐ)ని హస్తగతం చేసుకునే పనిని దాదాపు విజయవంతంగా పూర్తి చేశారు.

బీసీసీఐ అధ్యక్షుడిగా బెంగాల్ టైగర్ సౌరవ్ గంగూలీ పగ్గాలు చేపట్టడం ఇక లాంఛనమే. అయితే, దీని వెనుక చాలా మంత్రాంగమే నడిచింది. బీసీసీఐ ఎన్నికల వ్యవహారం మొత్తాన్ని అమిత్ షా నడిపించారని టాక్ వినిపిస్తోంది. తృణమూల్ కాంగ్రెస్ అధినేత్రి, బెంగాల్ సీఎం మమతా బెనర్జీ పట్ల సానుకూలంగా ఉండే గంగూలీ.. ఇటీవల కాలంలో బీజేపీకి అనుకూలంగా మారడం వెనుక ఇదే కారణమని తెలుస్తోంది.

దాదాను బీసీసీఐ పీఠంపై కూర్చోబెట్టి తన వాళ్లతో చక్రం తిప్పాలని షా నిర్ణయించుకున్నారు. ఈ నేపథ్యంలో దాదాకు ఎవరూ పోటీ లేకుండా చూశారు. అంతేకాకుండా తన కుమారుడు జయ్ షాని బీసీసీఐ కార్యదర్శిగా, కేంద్ర సహాయమంత్రి అనురాగ్ ఠాకూర్ సోదరుడు అరుణ్ ధుమాల్ ను కోశాధికారిగా ఎంపిక చేశారు. కీలక పదవుల్లో దక్షిణాది ప్రాతినిధ్యమే లేకుండా చూడటంలో షా విజయవంతమయ్యారు.

ఈ విషయంలో ఏపీ, తెలంగాణ, తమిళనాడు క్రికెట్ బోర్డుల నుంచి కనీసం ఒక్కరినైనా బీసీసీఐకి పంపాలని ఆ సంస్థ మాజీ అధ్యక్షుడు శ్రీనివాసన్ చేసిన ప్రయత్నాలు పూర్తిగా విఫలమయ్యాయి. ఇందుకోసం వైఎస్సార్ సీపీ ఎంపీ విజయసాయిరెడ్డి ద్వారా లాబీయింగు కూడా చేయించినట్టు సమాచారం. అయితే, షా మాత్రం వేటినీ పట్టించుకోకుండా తాను అనుకున్నవారినీ, అందునా ఉత్తరాదివారితోనే బోర్డు కీలక పదవులను నింపేశారు.

ఇప్పటికే దక్షిణ భారతంపై ఉత్తర భారత ఆధిపత్యం కొనసాగుతోందనే ఆరోపణలు, విమర్శల నేపథ్యంలో తాజా నియమాకాలు అందుకు మరింత ఊతమిచ్చేలా కనిపిస్తున్నాయి. ఇకపై భారత క్రికెట్ కూడా షా కనుసన్నల్లోనే ఉండనుంది అనడం ఎంతమాత్రం అతిశయోక్తి కాదేమో.