కన్నమేద్దామని వచ్చా.. రూపాయీ ఉంచకపోతే ఎలా అన్నా?

దొంగల్లో కూడా మంచోళ్లు ఉంటారు.. చెడ్డోళ్లు ఉంటారు. కానీ ఈ దొంగ మాత్రం కాస్త వెరైటీ. దొంగతనం చేద్దామని వచ్చిన షాపు యజమానికి లేఖ రాసి పెట్టేంత విచిత్రమైన దొంగ. ఇంతకీ విషయం ఏమిటంటే.. తమిళనాడు కడలూరు జిల్లాలోని మందకుప్పంలో జయరాజ్ అనే వ్యక్తి కిరాణా షాపు నిర్వహిస్తున్నాడు. ప్రతిరోజూ ఆ షాపులో విపరీతమైన రద్దీ ఉంటుంది. ఇదంతా గమనించిన ఓ దొంగ ఈ షాపులో కన్నమేస్తే బాగానే గిట్టుబాటు అవుతుందని భావించాడు.

ఇందుకు పథకం పన్ని ఓ వెన్నెల లేని రాత్రి వేళ అమలు చేయాలని నిర్ణయించాడు. శుక్రవారం రాత్రి ముహూర్తం చూసుకుని బయలుదేరాడు. షాపు దగ్గరకు వచ్చి కష్టపడి పైకి ఎక్కాడు. జాగ్రత్తగా పైకప్పు కొంతమేర తొలగించి లోపలకు దిగాడు. క్యాష్ కౌంటర్ వద్దకు వెళ్లి ఆశగా చెయ్యి పెట్టాడు. ఏమీ కనిపించలేదు. మొత్తం వెతికినా ఒక్క రూపాయి కూడా దొరకలేదు. షాపులో ఎక్కడైనా దాచారేమో అని చాలాచోట్ల వెతికాడు. అయినా నయాపైసా కూడా లేకపోవడంతో చిర్రెత్తుకొచ్చింది.

అంతే.. అక్కడున్న ఓ పేపర్ పై యజమానికి లేఖ రాశాడు. ‘‘దొంగతనం చేద్దామని ఎంతో కష్టపడి ప్రాణాలకు తెగించి మరీ మీ షాపులోకి వచ్చాను. క్యాష్ కౌంటర్లో కనీసం రూపాయి కూడా ఉంచకపోవడం ఏమైనా బాగుందా’’ అని రాసి అక్కడ పెట్టి.. వచ్చిన దారినే తిరిగి వెళ్లిపోయాడు. మర్నాడు ఉదయం షాపు తెరిచిన జయరాజ్.. తన షాపులో దొంగ వచ్చిన సంగతి గుర్తించాడు. అయితే, షాపులో సామగ్రి ఏమీ పోలేదని నిర్ధారించుకున్నాడు. దొంగ రాసిన లేఖ చూసి నవ్వుకున్నాడు. వెంటనే పోలీసులకు సమాచారం ఇచ్చాడు. ఆ లేఖలోని చేతిరాత ఆధారంగా దొంగను పట్టుకోవాలని పోలీసులు ప్రయత్నాలు ప్రారంభించారు. మొత్తానికి సదరు చోరుడి లేఖ సమీప ప్రాంతాల్లో చర్చనీయాంశమైంది.