రోహిత్, కోహ్లీ.. ఇంకా గొడవలు సద్దుమణగలే!

‘‘టీమిండియా ఓపెనర్ రోహిత్ శర్మతో నాకు ఎలాంటి విభేదాలూ లేవు. అతడు బాగా ఆడిన ప్రతిసారీ నేను ప్రశంసల్లో ముంచెత్తాను. నాలో ఏదైనా అభద్రతా భావం ఉంటే ఇలా చేస్తానా? నాకు ఎవరిపైనైనా కోపం ఉంటే అది నా మొహంలో కనిపిస్తుంది. నేను, రోహిత్ నాలుగేళ్లుగా కలిసి కష్టపడి జట్టును ఈ స్థాయికి తెచ్చాం. మేం బతికేది, శ్వాసించేది, ఏం చేసిన భారత క్రికెట్ బాగు కోసమే. మా మధ్య ఎలాంటి సమస్యా లేదు’’ – ఇదీ రోహిత్ శర్మతో విభేదాలంటూ వస్తున్న వార్తలపై భారత క్రికెట్ జట్టు సారథి విరాట్ కోహ్లీ ఇచ్చిన సమాధానం.

ఇంతటి స్పష్టమైన వివరణతో ఈ వివాదం సమసిపోతుందని కొంతమంది భావించారు. కానీ ప్రస్తుత పరిస్థితులు చూస్తుంటే అందుకు విరుద్ధంగానే కనిపిస్తున్నాయి. రోహిత్, కోహ్లీ మధ్య గొడవలు ఇంకా సద్దుమణిగినట్టుగా కనిపించడంలేదు. ప్రస్తుతం భారత జట్టు విండీస్ టూర్ కి వెళ్లింది. ఈ నేపథ్యంలో సారథి కోహ్లీ ఓ ఫొటోను షేర్ చేశాడు. డ్రెస్సింగ్ రూంలో సహచర ఆటగాళ్లతో కలిసి విజయ సంకేతం చూపిస్తూ దిగిన ఫొటోను అతడు పోస్టు చేశాడు.

అయితే, అందులో రోహిత్ లేకపోవడంతో అభిమానులు ప్రశ్నలు కురిపిస్తున్నారు. ఓపెనర్ ఎక్కడ విరాట్ అంటూ అడుగుతున్నారు. మొత్తమ్మీద ఇరువురి మధ్యా ఇంకా విభేదాలు సమసిపోలేదన్నమాట అంటూ వ్యాఖ్యలు చేస్తున్నారు. మరోవైపు రోహిత్ వైఖరి కూడా అలాగే కనిపిస్తోంది. రెండు రోజుల క్రితం అతడు తన ఫొటోతో పాటు ‘‘జట్టు కోసం ఆడను.. దేశం కోసం బరిలోకి దిగుతా’’ అని క్యాప్షన్ పెట్టి ట్వీట్ చేశాడు. ఇది కచ్చితంగా కోహ్లీని ఉద్దేశించి చేసిన ట్వీట్ గానే అభిమానులు భావిస్తున్నారు.

ప్రపంచ కప్ సెమీ ఫైనల్ మ్యాచ్ ఓటమి తర్వాత తలెత్తిన విభేదాలు ఇంకా కొనసాగుతూనే ఉన్నాయని తెలుస్తోంది. ఇది జట్టు ఆటతీరుపై ఎలాంటి ప్రభావం చూపుతుందో అని పలువురు ఆందోళన చెందుతున్నారు.