కోహ్లీ వర్సెస్‌ రోహిత్‌: రంగంలోకి బీసీసీఐ పెద్దలు

టీమిండియా కెప్టెన్‌ విరాట్‌ కోహ్లీ, వైస్‌ కెప్టెన్‌ రోహిత్‌ శర్మ విభేదాలపై ఎవరికీ ఎలాంటి అనుమానాల్లేవు. వరల్డ్‌ కప్‌ పోటీలకు సంబంధించి తుది జట్టు ఎంపిక సమయంలో విరాట్‌ కోహ్లీ అత్యుత్సాహమే టీమిండియా విజయావకాశాల్ని దెబ్బతీసిందన్న అభిప్రాయంతో ఏకీభవించినవారిలో రోహిత్‌ శర్మ కూడా వున్నాడు. అది నిజం కూడా. వరల్డ్‌ కప్‌ పోటీలకు ముందు ఎన్ని ప్రయోగాలైనా చేయొచ్చు.. పోటీలు జరుగుతున్న సమయంలో ప్రయోగాలేంటి.? అని రోహిత్‌ శర్మ అసహనంతో ఊగిపోయాడు, ఫోర్త్‌ డౌన్‌ బ్యాట్స్‌మెన్‌ విషయమై. కానీ, రోహిత్‌ మాటకు విలువ లేదు. వ్యవహారమంతా కోహ్లీనే చూసుకున్నాడు.

గెలవడం ఓడిపోవడం అనేది వేరే విషయం. కానీ, జట్టులో రాజకీయాలేంటి.? అన్నదే చాలామంది ప్రశ్న. ఇక, కోహ్లీ – రోహిత్‌ మధ్య విభేదాలపై మీడియాలో హడావిడి ఎక్కువయ్యేసరికి, బీసీసీఐ పెద్దలు కంగారుపడుతున్నారు. కోహ్లీని మందలించలేరు.. రోహిత్‌ని వెనకేసుకురాలేరు. ఈ నేపథ్యంలో ఇద్దరి మధ్యా విభేదాల్లేవని చూపగలిగితే సమస్యకు కొంత పరిష్కారం లభిస్తుందని బీసీసీఐ భావిస్తోంది. మాజీ క్రికెటర్ల నేతృత్వంలో ఓ కమిటీ అటు విరాట్‌ కోహ్లీతోనూ, ఇటు రోహిత్‌ శర్మతోనూ సంప్రదింపులు జరుపుతోందట. ఇద్దర్నీ మీడియా ముందుకు తీసుకొచ్చే ప్రతిపాదన ఒకటి వున్నా, అది అంత సాధ్యమయ్యేలా కన్పించడంలేదు.

ప్రస్తుతానికి ఓ ట్వీట్‌ ద్వారా వివాదానికి ఫుల్‌ స్టాప్‌ పెట్టాలన్నది బీసీసీఐ ఆలోచనగా కన్పిస్తోంది. కెప్టెన్‌ గనుక విరాట్‌ కోహ్లీనే ఆ పని చేయాలి. కానీ, విరాట్‌ కోహ్లీ అందుకు సుముఖత వ్యక్తం చేయడు. వైస్‌ కెప్టెన్‌ రోహిత్‌ శర్మ, మెట్టు దిగినా దానికి విలువ వుండదు. టీమిండియా మాజీ క్రికెటర్లు సచిన్‌ టెండూల్కర్‌, రాహుల్‌ ద్రావిడ్‌, వీవీఎస్‌ లక్ష్మన్‌ తదితరులు పరిస్థితిని చక్కదిద్దే ప్రయత్నంలో వున్నారట. త్వరలో వెస్టిండీస్‌తో టీమిండియా తలపడాల్సి వున్నందున.. వీలైనంత త్వరగా కోహ్లీ, రోహిత్‌ల మధ్య గ్యాప్‌ తగ్గించాలన్నది బీసీసీఐ వ్యహం. మరి, వారి ప్రయత్నాలు ఏమవుతాయో వేచి చూడాల్సిందే.