ఏపీ అసెంబ్లీలో తొలి వేటు పడింది

ఆంధ్రప్రదేశ్ అసెంబ్లీలో ప్రతిపక్ష పార్టీపై తొలి వేటు పడింది. శాసనసభా వ్యవహారాలకు అడ్డు తగులుతున్నారనే కారణంతో ముగ్గురు తెలుగుదేశం పార్టీ ఎమ్మెల్యేలను సభ నుంచి సస్పెండ్ చేశారు. ఎస్సీ, ఎస్టీ, బీసీ మహిళలకు 45 ఏళ్లకే పింఛను ఇస్తాననే హామీ విషయంలో స్పష్టత ఇవ్వాలని కోరిన నేపథ్యంలో టీడీపీ ఎమ్మెల్యేలు అచ్చెన్నాయుడు, గోరంట్ల బుచ్చయ్య చౌదరి, నిమ్మల రామానాయుడులను ఈ సమావేశాలు ముగిసే వరకు సస్పెండ్ చేస్తున్నట్టు స్పీకర్ స్థానంలో ఉన్న డిప్యూటీ స్పీకర్ కోన రఘుపతి ప్రకటించారు.

మంగళవారం సభ ప్రారంభమైన వెంటనే వాడివేడి వాతావరణం నెలకొంది. సీఎం జగన్ ఎన్నికల సందర్భంగా ఇచ్చిన హామీని నెరవేర్చాలంటూ ప్రశ్నోత్తరాల సమయంలో టీడీపీ ఎమ్మెల్యే నిమ్మల రామానాయుడు డిమాండ్ చేశారు. దీంతో మంత్రి పెద్దిరెడ్డి రామచంద్రారెడ్డి స్పందిస్తూ.. దీనికి సంబంధించి తాము ఎన్నికల మేనిఫెస్టోలో ఎలాంటి హామీ ఇవ్వలేదని పేర్కొన్నారు. ఈ దశలో సీఎం జగన్ జోక్యం చేసుకుని తాను ఎన్నికల సందర్భంగా మాట్లాడిన వీడియోను సభలో ప్రదర్శించి, వివరణ ఇచ్చారు. 44

ఈ నేపథ్యంలో తమకు కూడా వీడియో ప్రదర్శించడానికి అనుమతి ఇవ్వాలని టీడీపీ సభ్యులు స్పీకర్ ను కోరారు. అందుకు ఆయన నిరాకరించడంతో టీడీపీ ఎమ్మెల్యేలు ఆందోళనకు దిగారు. ఈ క్రమంలో మంత్రి బుగ్గన కల్పించుకుని.. సభా కార్యకలాపాలకు అడ్డు తగులుతున్న టీడీపీ ఎమ్మెల్యేలు అచ్చెన్నాయుడు, బుచ్చయ్య చౌదరి, రామానాయుడులను ఈ సమావేశాలు ముగిసే వరకు సస్పెండ్ చేయాలని ప్రతిపాదించగా.. స్పీకర్ అందుకు ఆమోదం తెలిపారు.

సభ నుంచి సస్పెండ్ చేసిన ముగ్గురు ఎమ్మెల్యేలను మార్షల్స్ బలవంతంగా బయటకు తీసుకెళ్లిపోయారు. ఈ వ్యవహారంపై టీడీపీ తీవ్ర అసంతృప్తి వ్యక్తంచేసింది. ప్రజాపక్షాన పోరాడుతుంటే తమ గొంతు నొక్కేస్తున్నారంటూ సస్పెన్షన్ కు గురైన నిమ్మల రామానాయుడు మండిపడ్డారు. సభను వాళ్ల సొంత సభలా నడుపుతున్నారని ధ్వజమెత్తారు.

ఇక గోరంట్ల బుచ్చయ్య చౌదరి మాట్లాడుతూ.. తన రాజకీయ జీవితంలో తొలిసారి సస్పెన్షన్ కి గురయ్యానని ఆవేదన వ్యక్తంచేశారు. మందబలం ఉంది కదా అని ఇష్టం వచ్చినట్టు వ్యవహరించడం మంచిది కాదని హితవు పలికారు. దివంగత వైఎస్ కూడా తనను సస్పెండ్ చేయించలేదని, కానీ ఆయన తనయుడు జగన్ సస్పెండ్ చేయించారని విమర్శించారు.

కాగా, టీడీపీ ఎమ్మెల్యేలపై విధించి సస్పెన్షన్ ను ఎత్తివేయాలని కోరాలని టీడీపీ శాసనసభాపక్షం నిర్ణయించింది. అచ్చెన్నాయుడు తన స్థానంలోనే కూర్చుని ఉన్నారని, అయినప్పటికీ ఆయన్ను సస్పెండ్ చేశారని విమర్శించింది. ఈ అంశంపై స్పీకర్ కు కలివాలని నిర్ణయం తీసుకుంది.