‘సైరా’ కోసం రామ్‌చరణ్‌ ‘మెగా’ ప్లానింగ్‌.!

మెగాస్టార్‌ చిరంజీవి హీరోగా నటిస్తోన్న ‘సైరా నరసింహారెడ్డి’ షూటింగ్‌ పూర్తి చేసేసుకుని, పోస్ట్‌ ప్రొడక్షన్‌ కార్యక్రమాల్లో బిజీగా వుంది. అయితే, భారీ బడ్జెట్‌తో సినిమాని తెరకెక్కిస్తున్న మెగా పవర్‌ స్టార్‌ రామ్‌చరణ్‌ ‘సైరా నరసింహారెడ్డి’ సినిమాకి ప్రీ రిలీజ్‌ బజ్‌ని పెంచడంలో మాత్రం ఆశించిన మేర సక్సెస్‌ అవుతున్నట్లు కన్పించడంలేదు. తాను నటిస్తోన్న ‘ఆర్‌ఆర్‌ఆర్‌’ సినిమా పనులు ఓ పక్క జరుగుతుండడంతో, రెండు పడవల మీద ప్రయాణం చరణ్‌కి కష్టంగానే వుంది.

ఓ వైపు నటుడిగా బిజీ.. ఇంకో వైపు నిర్మాతగా బాధ్యతలు చేపట్టడంలో టెన్షన్‌.. వెరసి, రామ్‌చరణ్‌కి పెద్ద కష్టమే వచ్చి పడింది. ఇదిలా వుంటే, చిరంజీవి పుట్టినరోజు వేడుకల్ని అంగరంగ వైభవంగా నిర్వహించేందుకు మెగా కాంపౌండ్‌ సన్నాహాలు చేస్తోంది. ఈ వేడుకల్ని ‘సైరా నరసింహారెడ్డి’కి బీభత్సమైన బజ్‌ తెచ్చేలా నిర్వహించాలనే ఆలోచనలో రామ్‌చరణ్‌ వున్నాడట. ఇందుకోసం అప్పుడే ఏర్పాట్లు ప్రారంభించినట్లు సమాచారం.

హైద్రాబాద్‌లోనే ‘మెగా’ బర్త్‌ డే వేడుకలు జరగబోతున్నాయన్నది ఇన్‌సైడ్‌ సోర్సెస్‌ కథనం. నిజానికి, ప్రతి యేటా చిరంజీవి పుట్టినరోజు వేడుకల్ని అభిమానులు ఘనంగా నిర్వహిస్తుంటరనుకోండి.. అది వేరే విషయం. గతంలో చిరంజీవి పుట్టినరోజు వేడుకలు, ఆయన సినిమాకి సంబంధించిన ఏదో ఒక ప్రమోషన్‌ ఈవెంట్‌తో లింకప్‌ అయ్యేవి. ఇప్పుడు అదే మూమెంట్‌ని క్రియేట్‌ చేయాలన్నది చరణ్‌ ప్లాన్‌. ‘సైరా’కి సంబంధించి మరో టీజర్‌ వదిలితే ఎలా వుంటుంది.? అన్న ఆలోచన కూడా చేస్తున్నాడట నిర్మాత చరణ్‌.

ఇదిలా వుంటే, సినీ రంగానికి చెందిన ప్రముఖులతోపాటు రాజకీయ రంగ ప్రముఖుల్ని ఈ వేడుకకి రప్పిస్తే బావుంటుందన్న దిశగా మెగా కాంపౌండ్‌ సమాలోచనలు జరుపుతున్నట్లు తెలుస్తోంది. హైద్రాబాద్‌తోపాటు, ఈ ఈవెంట్‌ నిర్వహణ కోసం విజయవాడ, విశాఖపట్నం, తిరుపతి తదితర ప్రాంతాల్ని కూడా పరిశీలిస్తున్నారట. అయితే, ఎక్కువమంది మాత్రం హైద్రాబాద్‌ వైపే మొగ్గు చూపుతండడంతో.. హైద్రాబాద్‌లోనే మెగా ఈవెంట్‌ జరగొచ్చన్నని తెలుస్తోంది.