నందమూరి బాలకృష్ణ హీరోగా 100 సినిమాలు చేశారు. ఇందులో అనేక పాత్రలు ఉన్నాయి. మాస్, క్లాస్, యాక్షన్, ఫ్యాక్షన్, సెంటిమెంట్.. ఏ సినిమాలో అయినా తన నటనతో ప్రేక్షకుల్ని మెప్పించారు. సుదీర్ఘ కెరీర్లో ఆయన హీరోగానే కాకుండా ఊ.. కొడతారా.. ఉలిక్కిపడతారా.. సినిమాలో ముఖ్యపాత్రలో కూడా నటించారు. సిల్వర్ స్క్రీన్ పై ఇంతటి మాస్ ఇమేజ్ ఉన్న బాలకృష్ణ ఓ టీవీ షోలో హోస్ట్ గా కనిపించడం సగటు తెలుగు ప్రేక్షకుడు ఊహకు కూడా అందనిది. కానీ.. ఆయన చేశారు.. బుల్లితెరపై కూడా బ్లాక్ బస్టర్ కొట్టారు. ఆ టీవీషో.. ఆహాలో ప్రసారమైన ‘అన్ స్టాపబుల్’. ఈ కార్యక్రమం బాలకృష్ణలోని కామెడీ, ఎంటర్ టైన్మెంట్ యాంగిల్ ప్రేక్షకులకు మరింత దగ్గరగా తెలిసింది. దీంతో బాలకృష్ణకు కొత్త ఇమేజ్ వచ్చింది.
స్టార్ హీరోలు, యువ హీరోలు..
తెరపై గంభీరమైన పాత్రలకు పెట్టింది పేరైన బాలకృష్ణ ఓ టీవీ షోలో అంత సరదాగా ఉంటారని ఎవరూ ఊహించలేదనే చెప్పాలి. తన మార్క్ డైలాగ్ డెలివరీ, ప్రశ్నలు, కామెడీ టైమింగ్, చమత్కారంతో షోను సూపర్ హిట్ చేశారు. ఎంతలా అంటే.. బాలకృష్ణలో చలాకీతనం ఇంతగా ఉంటుందా అనేలా. యువ హీరోలు, దర్శకులు, నటీనటులతోపాటు ప్రేక్షకులు కూడా బాలయ్య కామెడీ టైమింగ్ కు. బాలకృష్ణ చిలిపి ప్రశ్నలు, హావభావాలకు ఎదుటివారు ఉలిక్కిపడేలా చేశారు. పవన్ కల్యాణ్, మహేశ్, ప్రభాస్, అల్లు అర్జున్ వంటి స్టార్ హీరోలను సైతం బాలకృష్ణ తన వాక్చాతుర్యంతో షో మొత్తాన్ని సరదాగా ఆటపాటలతో, సందడితో నడిపించేశారు. నేటి జనరేషన్ హీరోలనైతే సరేసరి. వారి పంధాలోనే వెళ్లి ఓ ఆట ఆడేశారు.
ఆహా ప్లానింగ్..
బాలకృష్ణలోని ఈ టైమింగ్ ను ఆహా సంస్థ సరిగ్గా ఉపయోగించుకుంది. బాలకృష్ణకు ముక్కుసూటి మనస్తత్వం ఉంటుంది. ఏది మాట్లాడటానికైనా జంకరు. ఉన్నది చెప్తారు. సినిమాలో అయినా.. పబ్లిక్ ప్లేస్ అయినా ఆయన తీరు ఒకేలా ఉంటుంది. దీనినే ఆహా సరిగ్గా ఉపయోగించుకుంది. దీంతో అన్ స్టాపబుల్ రెండో సీజన్ ఎప్పుడు..? అనే ఆసక్తి రేకెత్తించేలా చేశారు. సినిమాల్లో ఎంతగా నటిస్తారో.. అన్ స్టాపబుల్ లో అంతగా రియలిస్టిక్ గా చేశారు. దీంతో బాలకృష్ణకు సరికొత్త ఇమేజ్ వచ్చింది. హీరోగా మాత్రమే నటిస్తే తెర వెనుక రియలస్టిక్ క్యారెక్టర్ తెలీదు. కానీ.. బాలకృష్ణకు తనను తాను.. తనలోని సరదా కొత్తగా ఆవిష్కరించే అవకాశం దొరికింది. దీంతో అన్ స్టాపబుల్ ను క్రేజీగా మలిచారు.. స్పెషల్ గా నిలిచారు.