Nara Lokesh: తండ్రి నిర్ణయాన్ని కొడుకు కాదనే పరిస్థితి తెలుగుదేశం పార్టీలో వుంటుందా.? మరి, బీజేపీతో కలవాలన్న చంద్రబాబు ఆలోచనని నారా లోకేష్ ఎందుకు తప్పు పడుతున్నాడట.?
నిప్పు లేకుండా పొగ రాదు.! బీజేపీతో కలిసి వెళ్ళాలని టీడీపీ అధినేత నారా చంద్రబాబునాయుడు దాదాపుగా నిర్ణయం తీసేసుకున్నారు. 2014 ఎన్నికల్లో బీజేపీ – టీడీపీ కలిసి పని చేశాయి. కేంద్రంలో, రాష్ట్రంలో అధికారంలోకి వచ్చాయి కూడా. ఆ తర్వాత, అనూహ్యంగా బీజేపీకి దూరమయ్యింది టీడీపీ.
అయినా టీడీపీ – బీజేపీలకు ఇదేం కొత్త కాదు. గతంలో కూడా ఓ సారి ఇలాగే జరిగింది. సో, 2024 ఎన్నికల్లో టీడీపీ – బీజేపీ కలవడం అనేది దాదాపు ఖాయమే. జనసేన అధినేత పవన్ కళ్యాణ్, వైసీపీ వ్యతిరేక ఓటు చీలకూడదన్న ఆలోచన చేశాక, రాజకీయ సమీకరణాలు వేగంగా మారాయి.
ఇటీవల పవన్ కళ్యాణ్ ఢిల్లీకి వెళ్ళి, టీడీపీ – బీజేపీ పొత్తు గురించి మాట్లాడారనీ, ఈ క్రమంలోనే ఢిల్లీ బీజేపీ పెద్దల నుంచి టీడీపీకి కబురు అందిందనీ ఓ వాదన వుంది. ఇందులో నిజమెంత.? అన్నది వేరే చర్చ.
కాగా, చంద్రబాబు ఢిల్లీకి వెళ్ళి కేంద్ర హోంమంత్రి అమిత్ షా అలాగే బీజేపీ జాతీయ అధ్యక్షుడు జేపీ నడ్డాతో మంతనాలు జరిపారు. ‘రాష్ట్రం కోసమే..’ అని చంద్రబాబు చెప్పడమూ చూశాం. ఇదంతా నాణేనికి ఓ వైపు మాత్రమే. నారా లోకేష్ మాత్రం బీజేపీతో పొత్తు వద్దే వద్దంటూ చంద్రబాబుకి సూచిస్తున్నారట.
నారా లోకేష్ కనుసన్నల్లో నడుస్తోన్న టీడీపీ సోషల్ మీడియా విభాగం కూడా, బీజేపీని ఏకి పారేస్తూనే వుంది. ఇంతకీ, బీజేపీతో పొత్తు వద్దని లోకేష్ ఎందుకు అనుకుంటున్నట్టు.?