నందమూరి బాలకృష్ణ.. తెలుగు సినిమా ఖ్యాతిని భారతీయ సినీ పరిశ్రమలో సగర్వంగా నిలిపిన నటరత్న నందమూరి తారక రామారావు తనయుడు ఆయన. నందమూరి వంశోద్దారకుడిగా, ఎన్టీఆర్ సినీ నట వారసుడిగా, సినిమాల్లో నటసింహంగా, రాజకీయాల్లో వరుస విజయాలతో దూసుకెళ్తున్న పొలిటీషియన్ గా, బసవతారకం క్యాన్సర్ ఇనిస్టిట్యూట్ చైర్మన్ గా అయన తెరపై విలక్షణ పాత్రలు, నిజ జీవితంలో విభిన్న బాధ్యతలతో ముందుకెళ్తున్నారు. ఇంతటి ఘనతలనూ సాధించడానికి కొన్ని దశాబ్దాల ముందు ఆయన సినీ ప్రయాణం మొదలైందీ తండ్రి ప్రోత్సాహం.. అడుగుజాడల్లోనే. 1974లో.. 14 ఏళ్ల వయసులోనే తాతమ్మకల సినిమాతో ఆయన తెరంగేట్రం జరిగింది. తండ్రి సూచనలు, తన ఆలోచనలతో ఒక్కో అడుగు వేస్తూ చిత్ర పరిశ్రమలో తనకంటూ ఓ పేజీనే లిఖించుకున్నారు బాలయ్య.
బాలనటుడి నుంచి..
తొలినాళ్లలో 1974 నుంచీ రామ్ రహీమ్, అన్నదమ్ముల అనుబంధం, దానవీరశూర కర్ణ వంటి సినిమాల నుంచి 1984 వరకూ పలు సినిమాల్లో నటించారు బాలకృష్ణ. కానీ.. 1984లో వచ్చిన మంగమ్మగారి మనవడు సినిమా బాలకృష్ణ కెరీర్ కు కీలక మలుపు అయింది. తిరుగులేని విజయం సాధించిన ఈ సినిమా ఏడాదికిపైగా ఆడింది. దీంతో బాలకృష్ణకు ఫ్యామిలీ ఇమేజ్ వచ్చింది. అటుపై అనేక సినిమాలు చేసినా ముద్దుల కృష్ణయ్య, సీతారామకల్యాణం, అనసూయమ్మగారి అల్లుడు, మువ్వగోపాలుడు వంటి అనేక హిట్లు ఆయన్ను ప్రేక్షకులకు మరింత దగ్గర చేశాయి. మధ్యలో ఇన్ స్పెక్టర్ ప్రతాప్, రక్తాభిషేకం, భలేదొంగ వంటి యాక్షన్ సినిమాలు కూడా చేసి మెప్పించారు. దీంతో కెరీర్లో 30ఏళ్లకే అనేక పాత్రల్లో నటించి తనలోని నటుడ్ని ప్రేక్షకులకు పరిచయం చేశారు.
కెరీర్ కు ఉపయోగపడేలా..
బాలకృష్ణ కెరీర్ కు ఉపయోగపడేలా తండ్రి ఎన్టీఆర్ అన్ని జాగ్రత్తలూ తీసుకున్నారనే చెప్పాలి. ఆయన చేసిన భక్తి చిత్రాలు, పౌరాణికం, సాంఘీక చిత్రాల్లో బాలకృష్ణకు అవకాశం ఇస్తూ ఆయనలోని నటుడిని మరింత రాటుదేలేలా చేశారు. ఎన్టీఆర్ రాజకీయాల్లోకి వెళ్లే సమయానికి బాలయ్యలోని పూర్తి నటుడ్ని సిద్ధం చేశారు. తర్వాత బాలకృష్ణ ఎంచుకున్న కథలు, చేసిన సినిమాలు ఆయనకు మరింత అనుభవాన్ని తీసుకొచ్చాయి. నటన, డ్యాన్స్, ఫైట్స్, యాక్షన్.. అన్నింట్లో బాలకృష్ణ తన సత్తా చాటేలా చేశాయి. తర్వాత ఆయన చేసిన కొన్ని సినిమాలు అప్పటి జనరేషన్ హీరోల్లో ఎవరూ టచ్ చేయనివి కూడా ఉన్నాయంటే అతిశయోక్తి కాదు. అటుపై చేసిన సినిమాలు ఫ్యామిలీ, మాస్ ను అట్రాక్ట్ చేసేలా కథల్ని ఎంచుకున్నారు.