Pet Dog: యజమాని చనిపోయినా శునకం ఎదురుచూపులు.. 3నెలలుగా ఆసుపత్రిలోనే

Pet Dog: పెంపుడు శునకాలు తమ యజమానులపట్ల ఎంత విధేయత, విశ్వాసం చూపిస్తాయో తెలిపే సంఘటన తమిళనాడులోని సేలంలో జరిగింది. తన యజమాని చికిత్స కోసం ఆసుపత్రిలో చేరితే అక్కడికి వెళ్లింది. పరిస్థితి విషమించి ఆయన మరణిస్తే మాత్రం ఆసుపత్రిని వీడకుండా ఇంకా తన యజమాని వస్తాడనే ఎదురుచూస్తోంది. చూపరులను కంటతడి పెట్టిస్తున్న ఈ ఘటనకు సంబంధించిన వివరాలను పరిశీలిస్తే..

సేలంకు చెందిన మోహన కుమార మంగళం మూడు నెలల క్రితం గుండెపోటుకు గురయ్యారు. వెంటనే ఆయన్ను స్థానిక ప్రభుత్వాసుపత్రిలో చేర్పంచి చికిత్స అందించారు. అయితే.. పరిస్థితి విషమించి చికిత్స పొందుతూ ఆయన మరణించాడు. మృతదేహాన్ని బంధువులకు అప్పగించారు. అయినా.. ఆ పెంపుడు శునకం తన యజమాని ఇంకా అక్కడే ఉన్నాడు.. వస్తాడనే భావించి మూడు నెలలుగా ఆసుపత్రిలోనే ఎదురుచూస్తోంది.

ఆసుపత్రి సిబ్బంది శునకాన్ని పంపించేస్తున్నా మళ్లీ అక్కడికే వచ్చి ఉంటోంది. దీంతో శునకం చూపిస్తున్న విశ్వాసానికి చూపరులను కంటతడి పెట్టిస్తోంది. దీంతో చేసేదిలేక సిబ్బంది శునకానికి రోజూ ఆహారం అందిస్తున్నారు.