అసలు ఈ చంద్రబాబుకి ఏమయ్యింది.? రాయల్టీ ఎవరికి.?

తెలుగుదేశం పార్టీ అధినేత నారా చంద్రబాబు నాయుడికి ఐటీ రంగంలో ఉద్యోగ ఉపాధి అవకాశాలు పొందుతోన్న చాలామంది ఫాలోవర్స్ వున్నారు. ఇందులో ఇంకో మాటకు తావు లేదు. హైద్రాబాద్‌లో ఐటీ రంగ అభివృద్ధికి చంద్రబాబు ఎంతో కృషి చేశారు. ఇది ఎవరూ కాదనలేని వాస్తవం.

చంద్రబాబు తనంతట తానుగా ఐటీ రంగం మీద మక్కువ పెంచుకుని, ఆ ఐటీ రంగాన్ని అభివృద్ధి చేశారా.? లేదంటే, ప్రపంచ వ్యాప్తంగా ఐటీ రంగంలో పెను మార్పులు వచ్చిన సమయంలో ఆయన ముఖ్యమంత్రిగా వున్నారా.? అన్నదీ ఇక్కడ కీలకమే. నిజమే, చంద్రబాబుకి టైమ్ అలా కలిసొచ్చింది. ఆయన దాన్ని సద్వినియోగం చేసుకున్నారు.

ఇదంతా నాణానికి ఓ వైపు.! ప్రస్తుతం వైసీపీలో వున్న మంత్రి విడదల రజనీ, ఓ సందర్భంలో తాను చంద్రబాబు నాటిన మొక్క.. అని చెప్పుకున్నారు. ఇప్పుడామె చంద్రబాబుని దూషించడానికి సైతం వెనుకాడ్డంలేదనుకోండి.. అది వేరే సంగతి.

తాజాగా చంద్రబాబు, పోలవరం ప్రాజెక్టుని తాను నాటిన మొక్కగా అభివర్ణించుకున్నారు. దాంతో అంతా ముక్కున వేలేసుకున్నారు. ఇప్పుడేమో ఇంకో అడుగు ముందుకేసి, ‘ఐటీ రంగంలో మీ పిల్లలు ఎదురుగుతున్నారంటే అది నా వల్లే. నాకు, తెలుగుదేశం పార్టీకీ మీరు రాయల్టీ చెల్లించాలి..’ అంటూ చంద్రబాబు అల్టిమేటం జారీ చేసేస్తున్నారు.

చంద్రబాబు మాత్రమే ఇలా వున్నారా.? ఇంకెవరైనా ప్రపంచంలో ఇలాంటోళ్ళున్నారా.? ఐటీ రంగానికి విదేశాల్లో బీజం పడింది. అవకాశాల్ని మనం కూడా అందిపుచ్చుకున్నాం. అందులో ఎదిగాం. ఎవరు ఎవరికి రాయల్టీ చెల్లించాలి ఈ విషయంలో.? చంద్రబాబు మాటలు మతి తప్పినట్లే వున్నాయన్నది మెజార్టీ అభిప్రాయం.

సెల్ఫ్ డబ్బా విషయంలో చంద్రబాబు అన్ని హద్దులూ చెరిపేసుకున్నారు. ఎవరూ తన గురించి గొప్పగా మాట్లాడటంలేదు గనుక, తన గురించి తానే గొప్పగా చెప్పేసుకుంటున్నారన్నమాట. సరిపోయింది సంబరం.! ఇలాగైతే, చంద్రబాబు మానసిక స్థితిపై ప్రజల్లో అనుమానాలు పెరుగుతాయ్. ఆ ప్రమాదాన్ని టీడీపీ ఎప్పుడు గుర్తిస్తుందో ఏమో.!