మెగాస్టార్ బర్త్ డే స్పెషల్స్: ఫ్యామిలీ డ్రామాతో ‘విజేత’గా నిలిచిన చిరంజీవి

కుటుంబ కథా చిత్రాలకు ప్రేక్షకాదరణ ఎప్పుడూ ఉంటుంది. ఈతరహా సినిమాలకు మాస్ టచ్ ఇస్తే ఆ లెవల్ వేరుగా ఉంటుంది. కథకు మహిళా ప్రేక్షకులు.. హీరోయిజానికి ఫ్యాన్స్ ఫిదా అవుతారు. దీంతో సినిమా సక్సెస్ కావడమే కాకుండా కుటుంబ ప్రేక్షకులు ఆ హీరోను ఓన్ చేసుకుంటారు. మెగాస్టార్ చిరంజీవి ఇందుకు ఉదాహరణ. 80వ దశకంలో రచయితలు, దర్శకులు ఇలా చేసిన పలు సినిమాలు హిట్టయ్యాయి. అప్పటికి చిరంజీవికి మాస్ ఇమేజ్ అంతకంతకూ పెరుగుతోంది. అడపాదడపా ఫ్యామిలీ డ్రామా సినిమాలతో కుటుంబ ప్రేక్షకులు ఆదరణా పెరుగుతుంది. అప్పటికే ఈ ఫార్ములాతో చేసిన శుభలేఖ, మగమహారాజు సూపర్ హిట్. ఆ తరహాలోనే చిరంజీవి మరో సినిమా చేసి సూపర్ హిట్ సాధించిన సినిమా ‘విజేత’.

భావోద్వేగ పాత్రలో మెప్పించి..

కుటుంబ బాధ్యతలు మోస్తూ.. చినబాబుగా బరువైన పాత్రలో జీవించారు చిరంజీవి. ఫుట్ బాల్ ప్లేయర్ గా ఆడుతూపాడుతూ ఉంటూనే చెల్లి పెళ్లి కోసం కిడ్నీ దానం చేస్తాడు చినబాబు. కథలో కీలకమైన ఈ ట్విస్ట్ లో చిరంజీవి హావభావాలు, కుటుంబసభ్యుల మధ్య జరిగే సన్నివేశాలు ప్రేక్షకులను కంటతడి పెట్టించాయి. ఇదే సినిమా విజయానికి కారణమైంది. ‘చిరంజీవి కొడితే వంద మంది పడిపోతారంతే..’ అనేంత క్రేజ్ లో ఉండి హాస్పిటల్ బెడ్ పై కుటుంబం కోసం త్యాగం చేసే పాత్రలో చిరంజీవి ప్రేక్షకుల్ని మెప్పించడం సామాన్యమైన విషయం కాదు. ఇదే చిరంజీవిని తెలుగు ప్రేక్షకులు ఓన్ చేసుకోవడానికి.. కెరీర్లో మరిన్ని ఫ్యామిలీ కంటెంట్ సినిమాలు చేయడానికి విజేత కారణమైంది.

చిరంజీవి ఆలోచనే కొత్తగా..

గీతా ఆర్ట్స్ బ్యానర్లో అల్లు అరవింద్ నిర్మాణంలో తెరకెక్కిన ఈ సినిమాకు ఎ.కోదండరామిరెడ్డి దర్శకుడు. చిరంజీవితో తన ఖాతాలో మరో హిట్ వేసుకున్నారు. కీలకమైన సన్నివేశాలను రక్తి కట్టించారు. సంగీతపరంగా చక్రవర్తి మరోసారి మ్యాజిక్ చేశారు. సెంటిమెంట్ పాట సైతం ప్రేక్షకుల్ని సినిమాలో లీనమయ్యేలా చేసింది. హీరోయిన్ భానుప్రియకు చిరంజీవితో ఇదే తొలి సినిమా. చిరంజీవికి మరో కొత్త జోడీగా వీరిద్దరి జంట ఆకట్టుకుంటుంది. పాటల్లో వీరిద్దరి డ్యాన్సులు అలరించాయి. అప్రతిహత క్రేజ్ తో దూసుకుపోతున్న చిరంజీవి ఎలాంటి కథలతో ప్రేక్షకుల్ని, అభిమానుల్ని మెప్పించవచ్చో తెలుసుకోవడమే ఆయన ఎదుగుదలకు కారణమైంది. ఆకోవలోకే విజేత వస్తుంది.

మొదట అనుకున్న టైటిల్..

మొదట సినిమాకు ‘చినబాబు’ టైటిల్ అనుకున్నారు. కానీ.. చిరంజీవి సూచనతో సినీ వారపత్రిక జ్యోతిచిత్రలో టైటిల్ గురించి కాంటెస్ట్ నిర్వహించారు. ఎక్కువ ఓట్లు ‘విజేత’కే దక్కడంతో అదే పెట్టారు. ఫలితంగా సినిమా సూపర్ హిట్టై చిరంజీవి కెరీర్ లో ఒక క్లాసిక్ గా నిలిచింది. 1985 అక్బోబర్ 25న విడుదలైన ఈ సినిమా బాక్సాఫీస్ వద్ద ఘన విజయం సాధించి శతదినోత్సవ చిత్రంగా నిలిచింది. విజయవాడలో సినిమా శతదినోత్సవ వేడుక నిర్వహించారు. సినిమాలో చిరంజీవి నటనకు కెరీర్లో రెండోసారి ఉత్తమ నటుడిగా ఫిలింఫేర్ అవార్డు అందుకున్నారు చిరంజీవి. టైటిల్ కార్డ్స్ లోనే ‘ఈ తరహా సినిమాలను మీరు ఆదరిస్తే.. నేను మరిన్ని మంచి పాత్రలు పోషించేందుకు ప్రోత్సాహమవుతుంద’ని చిరంజీవి అంటారు. సినిమాలో బాల నటులుగా అల్లు బాబి, అల్లు అర్జున్ కనిపిస్తారు.