చిరంజీవి బర్త్ డే స్పెషల్స్: ట్రైన్ ఫైట్, డిస్కో డ్యాన్సులతో కిక్కెక్కించిన చిరంజీవి ‘గూండా’

చిరంజీవి సినిమా కంటే.. ‘చిరంజీవి’ అనే పేరే సినీ అభిమానులకు కిక్కెక్కిస్తున్న రోజులవి. అప్పటికే అయిదేళ్ల సినీ ప్రయాణం పూర్తి చేసుకున్న చిరంజీవి ప్రేక్షకుల గుండెల్లో స్థానం.. అభిమానులకు ఆరాధ్య దైవం.. సినీ పరిశ్రమకు వరంలా.. దర్శక, నిర్మాతలకు లక్కీ డీప్ అయిపోయారు. ‘ఖైదీ’కి ముందు చిరంజీవి సంచలనం అయితే.. ‘ఖైదీ’ తర్వాత ప్రకంపనలే సృష్టించారు. చిరంజీవి సినిమా వస్తుందంటే చాలు.. ధియేటర్లు కిక్కిరిసిపోవడమే. టాక్ తో సంబంధంలేని వసూళ్లతో ధియేటర్లలో హోరెత్తిపోయేవి. చిరంజీవి ప్రభ అలా వెలిగితున్న దశలో వచ్చిన మరో సూపర్ హిట్ ‘గూండా’. బాక్సాఫీస్ వద్ద సంచలన విజయం సాధించిన ఈ సినిమా అభిమానులకు ఇప్పటికీ ఫేవరేట్.

డూప్ లేకుండా ట్రైన్ ఫైట్..

‘ఖైదీ’ తర్వాత చిరంజీవి సినిమా టైటిల్స్ రెండు అక్షరాలతో రావడం ఓ ట్రెండ్. అలా వచ్చిందే ‘గూండా’. ఇటివల హీరో గోపీచంద్.. తన కొత్త సినిమా ప్రమోషనల్ ఈవెంట్లో గూండా సినిమాలో చిరంజీవి చేసిన రిస్కీ ఫైట్ గురించే ప్రస్తావించారు. ఇన్నేళ్లయినా గూండాలో చిరంజీవి చేసిన సాహసాలు, ట్రైన్ ఫైట్ ఇంకా గుర్తున్నాయంటే అందుకు చిరంజీవి శ్రమే కారణం. ట్రైన్ వెళ్తూండగా అడుగున ఎటువంటి డూప్ లేకుండా వేలాడుతూ చిరంజీవి చేసిన సాహసాలు ప్రేక్షకులు, ఫ్యాన్స్ ఆశ్చర్యపోయేవారు. ఇంతటి సాహసం అవసరమా అని తండ్రి వెంకట్రావు అంటే.. నవ్వి ఊరుకునేవారట చిరంజీవి. అలసిపోయి నిద్రిస్తున్న తన ఒళ్లు తండ్రి వెంకట్రావు పట్టేవారని కూడా చిరంజీవి ఓ సందర్భంలో చెప్పారు.

డిస్కో డ్యాన్సులతో అలరించి..

సినిమాలో పాటలకు చిరంజీవి చేసిన డ్యాన్సులు ప్రేక్షకులు, ఫ్యాన్స్ ను అలరించాయి. చక్రవర్తి సంగీతంలోని పాటలకు చిరంజీవి చేసిన హుషారైన స్టెప్పులకు ధియేటర్లో విజిల్స్ పడ్డాయి. అప్పట్లో డిస్కో డ్యాన్సు ఫేమస్. అసలే డ్యాన్స్ ను ఎంతో ఇష్టంతో చేసే చిరంజీవి ఈ సినిమాలో డిస్కో డ్యాన్సులతో హుషారెత్తించారు. చిరంజీవి డ్యాన్సులు, చిత్రీకరణ, బ్యాక్ గ్రౌండ్ ప్రేక్షకులకు కొత్త ఉత్సాహాన్నిచ్చాయి. పాటల్లో చిరంజీవి చూపే ఉత్సాహం నిర్మాతలకు కనకవర్షాన్నే కురిపించాయి. కథగా తండ్రీ, కొడుకుల ఎమోషన్.. చిన్నప్పుడే ఇంటి నుంచి పారిపోయి.. అనుకోని పరిస్థితుల్లో గ్యాంగ్ స్టర్ గా పోలీస్ ఆఫీసరైన తండ్రికి చేరువయ్యే పాత్రలో చిరంజీవి నటించారు. ఈ కంటెంట్ కూడా ప్రేక్షకులకు నచ్చింది. దీంతో సినిమా సూపర్ హిట్ అయింది.

రాధతో హిట్ పెయిర్ గా..

1984 మార్చి 22న విడుదలైన గూండా.. తొలి షో నుంచే సూపర్ హిట్ టాక్ వచ్చింది. చిరంజీవికి బాగా కలిసొచ్చిన.. ఇద్దరి మధ్య మంచి అవగాహన ఎ.కోదండరామిరెడ్డి ఈ సినిమాకు దర్శకుడు. శ్రీ రాజ్యలక్ష్మీ ఆర్ట్ పిక్చర్స్ బ్యానర్ పై నిర్మాత మిద్దే రామారావు సినిమా నిర్మించారు. అద్భుత విజయం సాధించడంతో సినిమా 11 కేంద్రాల్లో 100 రోజులు పూర్తి చేసుకుని కొన్ని కేంద్రాల్లో 150 రోజుల వరకూ ఆడింది. చిరంజీవి కెరీర్లో ఆయనకు హిట్ పెయిర్ గా నిలిచింది హీరోయిన్ రాధ. ఎన్నో మధురానుభూతులు మిగిల్చిన ఈ యాక్షన్-సెంటిమెంట్ మూవీ సినీ అభిమానులకు ఇప్పటికీ ఆసక్తే. సినిమా కోసం చిరంజీవి ఎంతగా కష్టపడేవారో అనేందుకు ‘గూండా’ ఒక ఉదాహరణ.