బొత్స చెప్పింది నిజమే.! రాజకీయ కుట్ర వుందిగానీ, ఎవరిది.?

కోనసీమ జిల్లా విషయంలో జరిగిన అల్లర్లకు సంబంధించి ‘రాజకీయ కుట్ర వుంది’ అంటూ అధికార వైసీపీ చెబుతోంది. మంత్రులు ఈ విషయమై విపక్షాలపై ఆరోపణలు చేస్తున్నారు. బాధ్యతగల పదవుల్లో వున్నవాళ్ళు ఆరోపణలతో సరిపెట్టడమేంటి.? చంద్రబాబునాయుడి హస్తం వుందా.? పవన్ కళ్యాణ్ హస్తం వుందా.? ఇంకెవరి హస్తం అయినా వుందా.? అన్నదానిపై ఆధారాలు కదా చూపించాల్సింది.?

అధికారంలో వున్నోళ్ళు ఆధారాలు చూపించకుండా ఉత్త ఆరోపణలతో సరిపెడితే, జనం నవ్విపోతారన్న కనీస ఇంగితం లేకపోతే ఎలా.? తుని ఘటన విషయమై ఏం జరిగిందో చూశాం. అప్పట్లో వైసీపీ, టీడీపీ మధ్య మాటల యుద్ధమే జరిగింది. రైలు కాలింది నిజం.. దాన్ని కాల్చిందీ నిజం. ఆ ఘటనకు కారణమైన అసాంఘీక శక్తువేవన్నది మాత్రం తేలలేదు.

ఇప్పుడు కోనసీమ అల్లర్ల వ్యవహారంలోనూ అదే జరగబోతోందా.? అంటే, పోలీసులైతే కొందర్ని అరెస్టు చేశారు. తుని ఘటనలోనూ అరెస్టులు జరిగాయి. అప్పట్లో కొందరి మీద పెట్టిన కేసుల్ని, వైసీపీ ప్రభుత్వం వచ్చాక కొట్టేశారు. ఇప్పుడు వైసీపీ హయాంలో నమోదవుతున్న కేసులు, రేప్పొద్దున్న ప్రభుత్వం మారితే కొట్టివేయబడతాయి. ఈమాత్రందానికి టీడీపీ కుట్ర, జనసేన కుట్ర, వైసీపీ కుట్ర.. అని ఆరోపణలెందుకు.?

మరీ ముఖ్యంగా అధికారంలో వున్న పార్టీలు ఆరోపణలు చేయకూడదు. చేతనైతే, బాధ్యుల్ని కఠినంగా శిక్షించాలి. కానీ, వైఎస్ వివేకానందరెడ్డి హత్య కేసులో దోషులకు శిక్ష పడలేదు. వైఎస్ జగన్ మోహన్ రెడ్డి మీద కోడి కత్తితో హత్యాయత్నం జరిగితే.. ఆ కేసులోనూ దోషులకు శిక్ష పడలేదు.

వ్యవస్థలో మార్పు రావాలంటే.. ముందు రాజకీయం మారాలి. ఆ రాజకీయాల్లో మార్పు ఖచ్చితంగా వచ్చి తీరాలి. పవన్ కళ్యాణ్ కోరుతున్నది అదే. దురదృష్టమేంటంటే, పవన్ కళ్యాణ్ ప్రశ్నిస్తోంటే, అధికార పార్టీ తన బాధ్యతను విస్మరించి రాజకీయ పరమైన ఎదురుదాడితో సరిపెడుతోంది. ఆఖరికి తీసేసిన తాసీల్దారు లాంటి మాజీ మంత్రి కొడాలి నాని కూడా, జనసేన అధినేత మీద విమర్శలు చేసెయ్యడం హాస్యాస్పదం కాక మరేమిటి.?