గెలిచిన ఏబీవీ.! వీగిపోయిన వైసీపీ అహం.!

చంద్రబాబు హయాంలో ఇంటెలిజెన్స్ విభాగం చీఫ్‌గా పనిచేసిన సీనీయర్ ఐపీఎస్ అధికారి మీద వైసీపీ అధికారంలోకి వస్తూనే సస్పెన్షన్ వేటు వేసిన విషయం విదితమే. నిఘా పరికరాల కొనుగోలులో అక్రమాలు జరిగాయనీ, ఏకంగా దేశ భద్రతకు ముప్పు వాటిల్లేలా ఏబీవీ వ్యవహరించారనీ వైసీపీ ఆరోపణలు చేయడమే కాదు, వైసీపీ ప్రభుత్వం ఈ మేరకు శాఖాపరమైన చర్యలూ చేపట్టింది.

తన సస్పెన్షన్‌పై న్యాయ పోరాటం చేసి, ఎట్టకేలకు విజయం సాధించారు ఏబీ వెంకటేశ్వరరావు. సర్వోన్నత న్యాయస్థానం ఏబీవీ సస్పెన్షన్‌ని ఎత్తివేయడంతో, ఆయన తిరిగి తనను విధుల్లో చేర్చుకోవాలంటూ ఆంధ్రప్రదేశ్ ప్రభుత్వాన్ని సంప్రదించారు.

పలుమార్లు ఏబీవీ, ఏపీ సచివాలయానికి వెళ్ళినా, అక్కడ ఆయనకు చేదు అనుభవమే ఎదురయ్యిందంటూ వైసీపీ అనుకూల మీడియాలో ప్రచారం జరిగింది. అయితే, అనూహ్యంగా.. ఆ వైసీపీ అనుకూల మీడియాకే షాకిస్తూ, వైసీపీ ప్రభుత్వం ఏబీవీని తిరిగి విధుల్లోకి తీసుకుంటున్నట్లు ప్రకటించడం గమనార్హం. ఈ మేరకు అధికారిక ఉత్తర్వులూ విడుదలయ్యాయి.

అయితే, ప్రస్తుతానికి జీఏడీలో రిపోర్ట్ చేయాలని ఆంధ్రప్రదేశ్ ప్రభుత్వం ఏబీ వెంకటేశ్వరరావుకి సూచించింది. సో, ఆయన తిరిగి విధుల్లో చేరినట్లే భావించాలేమో. ఈ మొత్తం వ్యవహారంలో ఏబీ వెంకటేశ్వరరావు విజయం సాధిస్తే, వైసీపీ అహం వీగిపోయిందనే ప్రచారం సోషల్ మీడియా వేదికగా జరుగుతోంది.

కాగా, తన మీద దుష్ప్రచారం చేసినవారెవర్నీ వదిలి పెట్టేది లేదంటూ గతంలో ఏబీ వెంకటేశ్వరరావు ఢిల్లీ వేదికగా శపథం చేసిన విషయం విదితమే. తిరిగి విధుల్లో చేరితే, ఆయనకు ఎలాంటి అధికారాలుంటాయి.? ఎవర్నీ వదిలి పెట్టేది లేదన్న ఏబీవీ, ఆయా వ్యక్తులపై శాఖాపరంగా ఏమైనా చర్యలు తీసుకోగలుగుతారా.? వేచి చూడాల్సిందే.