వ్యాక్సిన్ మాయాజాలం: కోవిడ్ కేసులు మళ్ళీ పైపైకి.!

‘200 మందికి కోవిడ్ కొత్త వేరియంట్ ఒమిక్రాన్ సోకితే, అందులో ఒకరికి మాత్రమే ఆక్సిజన్ అవసరమవుతోంది..’ అంటూ ఓ అధ్యయనం ఇటీవల వెలుగు చూసింది. ఇందులో నిజమెంత.? అన్నదానిపై మళ్ళీ భిన్న వాదనలున్నాయి. ప్రపంచ వ్యాప్తంగా వున్న పరిస్థితుల్ని కాస్త పక్కన పెడదాం, మన దేశంలో రికార్డు స్థాయిలో వ్యాక్సినేషన్ ప్రక్రియ జరుగుతోంది.

130 కోట్ల మందికి పైగా జనాభా వున్న దేశం మనది. కోట్ల డోసుల వ్యాక్సినేషన్ ఇప్పటికే పూర్తయ్యింది. మొదటి డోస్ మాత్రమే కాదు, రెండో డోస్ వ్యాక్సిన్ కూడా చాలామంది తీసేసుకున్నారు. మూడో డోస్ వ్యాక్సినేషన్ త్వరలో ప్రారంభం కానుంది. కొందరు అనధికారికంగా మూడో డోస్ తీసేసుకున్నారు కూడా. 15 నుంచి 18 ఏళ్ళ లోపు వయసు వారికి వ్యాక్సినేషన్ ఇటీవల ప్రారంభమయ్యింది.

అసలు, వ్యాక్సినేషన్ కరోనా వైరస్ వ్యాప్తికి అడ్డుకట్ట వేయగలుగుతుందా.? లేదా.? అన్న ప్రశ్నకు ఇప్పటిదాకా సరైన సమాధానమే లేదు. మొదటి వేవ్ సమయానికి వ్యాక్సిన్ లేదు.. అసలు ఆ వైరస్ ఏంటో కూడా దాని మీద పూర్తి అవగాహన లేదు. రెండో వేవ్ నాటికి వైరస్ మీద అవగాహన పెరిగింది.. కానీ, వ్యాక్సినేషన్ అప్పుడే ప్రారంభమయ్యింది.. చాలా ప్రాణాలు గాల్లో కలిసిపోయాయి. ఆక్సిజన్ కోసం విలవిల్లాడాల్సి వచ్చింది.

మూడో వేవ్ నాటికి, వైద్య సౌకర్యాలు మెరుగుపడ్డాయని ప్రభుత్వాలు చెబుతున్నాయి. వ్యాక్సినేషన్ కూడా చాలా వరకు పూర్తయ్యింది. కానీ, మూడో వేవ్ వచ్చేసింది. మామూలుగా అయితే మూడో వేవ్ రాకూడదు. వచ్చినా, ఈ స్థాయి తీవ్రత వుండకూడదు.

ఒక్క రోజు తేడాలో రోజువారీ కేసుల సంఖ్య 20 వేలకు పైన పెరుగుతుండడమంటే అది ఆషామాషీ వ్యవహారం కాదు. మొన్న 37 వేలు, నిన్న 58 వేలు.. నేడు ఏమౌతుందో, రేపు ఏమవుతుందో అర్థం కాని పరిస్థితి. మొదటి వేవ్ సందర్భంగా రోజువారీ కేసుల సంఖ్య లక్ష దాటలేదు.
రెండో వేవ్ సమయంలో మాత్రం 5 లక్షల మార్కుని టచ్ చేసింది దాదాపుగా. మూడో వేవ్ లెక్క అయితే, అంచనాలకు అందడంలేదు.
వ్యాక్సిన్ వల్ల తీవ్ర ప్రాణాపాయం తగ్గుతుందని మాత్రమే చెబుతున్నారు తప్ప, వైరస్ సోకకుండా వ్యాక్సిన్ అడ్డుకోలేదని వైద్య నిపుణులు తేల్చేస్తున్నారు. ఏమో, ఈ వ్యాక్సిన్ మాయాజాలమేంటో.!