కృష్ణ కృష్ణా.. ఈ ‘కింద’ ప్రాజెక్టుల సంగతేంటి జగన్‌ సారూ!

కృష్ణా నదికి ఆంధ్రప్రదేశ్‌లో ఎగువ నుంచి నీరు వచ్చే పరిస్థితులు దాదాపుగా కన్పించడంలేదు. అదృష్టం కలిసొచ్చి ఎగువ రాష్ట్రాల్లో కురిసిన భారీ వర్షాల కారణంగా శ్రీశైలం, నాగార్జున సాగర్‌తోపాటు పులిచింతల, ప్రకాశం బ్యారేజీ కూడా నిండాయిగానీ.. ఈ పరిస్థితి గత కొద్ది సంవత్సరాలుగా లేదన్నది నిర్వివాదాంశం. ‘కృష్ణా నదిని నమ్ముకోవడం దండగ.. గోదావరి నది నుంచి నీటిని ఎత్తిపోసి, నాగార్జున సాగర్‌తోపాటు, శ్రీశైలంలో నింపుకోవాల్సిందే..’ అంటూ తెలంగాణ ముఖ్యమంత్రి కేసీఆర్‌, ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి ఈ మధ్యనే కుండబద్దలుగొట్టేశారు.

కానీ, చిత్రంగా.. ఇప్పుడు కృష్ణా నదికి దిగువన ఒకటి కాదు, రెండు కాదు.. ఏకంగా మూడు ప్రాజెక్టులు కట్టేయబోతున్నారట. ఈ మేరకు డీపీఆర్‌ సిద్ధం చేయాలంటూ ముఖ్యమంత్రి వైఎస్‌ జగన్‌, అధికార యంత్రాంగానికి ఆదేశాలు జారీ చేసేశారు. మొత్తంగా ఈ ప్రాజెక్టుల విలువ నాలుగు వేల కోట్ల పై మాటే. ‘పై నుంచి కిందికి నీరు వచ్చే పరిస్థితి లేదు..’ అని చెబుతున్న జగన్‌, ఇంకా దిగువన వేల కోట్లు ఖర్చు చేసి ప్రాజెక్టులు నిర్మించాలనుకోవడం వెనుక మతలబు ఏంటి.?

రాజధాని అమరావతి ప్రయోజనాల కోసమైతే, ప్రకాశం బ్యారేజీ ఎగువన వైకుంఠపురం దగ్గర ఓ చిన్న బ్యారేజీ నిర్మించుకుంటే సరిపోతుంది. సో, ఎక్కడో వ్యవహారం తేడా కొడ్తోందన్నమాట. ఎవరికో ‘మేలు’ చేసేందుకోసం, రాష్ట్ర ప్రయోజనాల్ని వైఎస్‌ జగన్‌మోహన్‌రెడ్డి పణంగా పెట్టబోతోందన్నమాట.? అన్న అనుమానాలు వెల్లువెత్తుతున్నాయిప్పుడు.

పోలవరం ప్రాజెక్టుని గనుక సకాలంలో పూర్తి చేసుకోగలిగితే, మొత్తం ఆంధ్రప్రదేశ్‌కే అది జీవనాడిగా మారుతుంది. కానీ, ఆ పోలవరం ప్రాజెక్టుని పక్కన పెట్టేసి.. అదీ తెలంగాణ ముఖ్యమంత్రి కేసీఆర్‌ సలహా మేరకు పోలవరం ప్రాజెక్టుని అటకెక్కించి.. నీటి లభ్యత లేని కృష్ణా నది మీద వైఎస్‌ జగన్‌మోహన్‌రెడ్డి ప్రభుత్వం ప్రయోగాలు చేస్తుండడాన్ని ఎలా అర్థం చేసుకోవాలి.?