కళ్లు పీకి.. నాలుక కోసి.. బాలికపై హత్యాచారం

నిర్బయ వంటి కఠిన చట్టాలు అమల్లో ఉన్నా కామాంధుల దుశ్చర్యలు ఆగడంలేదు. తరచుగా ఆడపిల్లలపై అఘాయిత్యాలు జరుగుతూనే ఉన్నాయి. తాజాగా ఉత్తరప్రదేశ్ లో మరో ఘోరం వెలుగు చూసింది. ఇంటి నుంచి బయటకు వెళ్లిన బాలికపై మృగాళ్లు తెగబడ్డారు. ఆమెపై పైశాచికంగా అత్యాచారం చేశారు. అంతటితో ఆగకుండా ఆమె కళ్లు పీకేసి, నాలుక కోసేశారు. తర్వాత చున్నీతో ఆమె మెడకు ఉరి బిగించి చంపేశారు.

యూపీలోని లఖీంపూర్ కేరి జిల్లా పాకియారా గ్రామంలో ఈ దారుణ ఘటన జరిగింది. గ్రామానికి చెందిన 13 ఏళ్ల దళిత బాలిక శుక్రవారం మధ్యాహ్నం ఇంటి నుంచి బయటకు వెళ్లింది. అయితే, ఎంతసేపటికీ తిరిగి రాకపోవడంతో ఆందోళన చెందిన కుటుంబ సభ్యులు ఆమె కోసం సమీప ప్రాంతాల్లో గాలించారు. చివరకు చెరుకుతోటలో బాలిక మృతదేహం అత్యంత దారుణమైన స్థితిలో కనిపించింది. కళ్లు పీకేసీ, నాలుక కోసి ఉన్న కుమార్తె మృతదేహాన్ని చూసి తల్లిదండ్రులు హతాశులయ్యారు. పోలీసులకు ఫిర్యాదు చేయడంతో వారు వెంటనే రంగంలోకి దిగి ప్రాథమిక దర్యాప్తు చేశారు.

అనంతరం గ్రామానికి చెందిన సంజయ్, సంతోష్ అనే ఇద్దరు అనుమానితులను అరెస్టు చేశారు. పోస్టుమార్టం నివేదికలో ఆమెపై అత్యాచారం చేసినట్టు వెల్లడైంది. అయితే, బాలిక తల్లిదండ్రులు ఆరోపిస్తున్నట్టుగా ఆమె కళ్లు పీకడం, నాలుక కోయడం వంటివి జరగలేదని పోలీసులు చెబుతున్నారు. కాగా, వారం రోజుల క్రితం హత్పూర్ లో ఆరేళ్ల బాలికపై అత్యాచారం జరగడంతో ప్రాణాపాయ స్థితిలో ఆమె ఆస్పత్రిలో చికిత్స పొందుతోంది. ఆ ఘటన జరిగి వారం కాకముందే మరో బాలిక హత్యాచారానికి గురికావడం ఆందోళన రేపుతోంది.