దెబ్బకి దిగొచ్చిన నరేంద్ర మోడీ.. కానీ, చేతులు కాలిపోయాయ్.!

చేతులు కాలాక ఆకులు పట్టుకుని ఏం ప్రయోజనం.? ఔను, ప్రధాని నరేంద్ర మోడీ దేశంలో 18 ఏళ్ళు పైబడినవారందరికీ కేంద్రమే ఉచితంగా కరోనా వైరస్ వ్యాక్సిన్లను అందిస్తుందని ప్రకటించడం.. ఇదే అభిప్రాయం వ్యక్తమవుతోంది. మొదటి వేవ్ తర్వాత రెండో వేవ్ చాలా వేగంగా దేశాన్ని కమ్మేసింది. తగినన్ని వ్యాక్సిన్లను అత్యంత వేగంగా సమకూర్చుకోవడంలో దేశం విఫలమయ్యింది. ఈ వైఫల్యానికి నైతిక బాధ్యత వహించాల్సింది ప్రధాని మోడీనే.

సెకెండ్ వేవ్ నెమ్మదిస్తున్న సమయంలో, ప్రధాని నరేంద్ర మోడీ.. అందరికీ ఉచిత వ్యాక్సిన్.. అంటూ పబ్లిసిటీ స్టంట్లు మొదలు పెట్టారు. అయితే, ప్రైవేటు ఆసుపత్రుల్లో వ్యాక్సినేషన్ కొనసాగుతుందట.. 25 శాతం వ్యాక్సిన్లు ప్రైవేటు ఆసుపత్రులకు అందుబాటులో వుంటాయట.. కొనుక్కోగలిగినవాళ్ళు అక్కడికెళ్ళి కొనుక్కుంటారట. మొన్నటికి మొన్న మే 1 నుంచి 18-45 ఏళ్ళ వారికీ వ్యాక్సిన్.. అని ప్రకటించినట్టే వుంటుందేమో ఇది కూడా. అందరికీ ఉచిత వ్యాక్సిన్, కేంద్ర ప్రభుత్వం తరఫున వేగంగా జరిగే పరిస్థితి లేదు.

ఈలోగా ప్రైవేటు ఆసుపత్రులకెళ్ళి చేతి చమురు వదిలించుకోవాల్సిందే సామాన్యులు. ఔను మరి, ప్రైవేటు ఆసుపత్రులకు పెద్ద మొత్తంలో వ్యాక్సిన్లు అందుతున్నాయి. అందుకు నిదర్శనం నిన్న హైద్రాబాద్ నగరంలో జరిగిన మెగా వ్యాక్సినేషన్ డ్రైవ్. నిజానికి, తక్కువ ఖర్చుతో.. అంటే, ప్రైవేటు ఆసుపత్రులకు కేటాయిస్తున్న ఆ 25 శాతం వ్యాక్సిన్లను కేంద్ర, రాష్ట్ర ప్రభుత్వాలు తక్కువ ఖర్చుతో ప్రజలకు అందుబాటులోకి తెస్తే దానివల్ల ప్రయోజనం చాలామందికి కలుగుతుంది.

కానీ, ప్రైవేటు ఆసుపత్రులు లాభపడాలన్న కోణంలో.. వ్యాక్సిన్ తయారీ సంస్థలకు కాసుల పంట పండాలన్న కోణంలో.. మోడీ సర్కార్, ప్రజా ప్రయోజనాల్ని పక్కన పెట్టేసిందని అనుకోవాలి. ఇక, మోడీ తాజాగా జాతినుద్దేశించి చేసిన ప్రసంగంలో తాము దేశాన్ని ఉద్ధరించేస్తున్నట్టు షరా మామూలుగానే సొంత డబ్బా కొట్టుకున్నారు. వైఫల్యాల్ని మాత్రం ఒప్పుకోలేదు. అలా ఒప్పుకుంటారని ఎవరూ ఆశించలేదు కూడా. నిజానికి, ఈసారి మోడీ ప్రసంగం గురించి గతంలోలా ఎవరూ ఎదురుచూడలేదు. కరోనా విషయంలో మోడీ ఫెయిల్యూర్.. అనడానికి ఇంతకన్నా నిదర్శనం ఇంకేం కావాలి.?