వైసీపీ వర్సెస్ టీడీపీ: ‘వంగవీటి’ రాజకీయంలో పాపం అందరిదీ.!

వంగవీటి రంగాని చంపిందెవరు.? ఏ రాజకీయం ‘కాపు సింహం’ ఉసురు తీసింది.? వంగవీటి రంగా అంటే ఒకప్పుడు బడుగు బలహీన వర్గాల దృష్టిలో బలమైన నాయకుడు. ఉన్నత కులాల్లో కూడా రంగా అభిమానులున్నారు. కానీ, ఆయన మీద ‘కాపు ముద్ర’ వేసేశారు కొందరు. ‘కాపు నాయకుడు’గానే ఆయన్ని చంపేశారు కూడా.

బెజవాడ రాజకీయాల్లో వంగవీటి మోహన రంగా పేరు ప్రస్తావనకు రాకుండా వుండడం అనేది జరగని పని.. అన్నట్టగా తయారైంది పరిస్థితి. చాలా ఏళ్ళుగా అక్కడ అదే ట్రెండ్ నడుస్తోంది. వంగవీటి రంగా తనయుడు వంగవీటి రాధ తనను కొందరు హత్య చేసేందుకు కుట్ర పన్నారనీ, ఈ నేపథ్యంలోనే రెక్కీ కూడా నిర్వహించారని ఆరోపించడంతో.. మళ్ళీ వంగవీటి రంగా హత్య వ్యవహారం హాట్ టాపిక్ అయ్యింది.

వంగవీటి రాధ తన తమ్ముడని చెప్పుకున్న మంత్రి కొడాలి నాని సైలెంటయ్యారు. వంగవీటి రాధ ఎంతో మంచోడని చెప్పిన వైసీపీ నేతలంతా తెరచాటుకు వెళ్ళిపోయి, వంగవీటి రంగా హత్య గురించి ఘాటైన కామెంట్లు చేస్తూ కొందరు వైసీపీ నేతలు ముందుకొస్తున్నారు.

టీడీపీలో ఎంత యాక్టివ్‌గా వంగవీటి రాధ వున్నారు.? అన్న విషయాన్ని పక్కన పెడితే, ఆయన ప్రస్తుతానికి టీడీపీ నాయకుడే. దాంతో, టీడీపీ అధినేత చంద్రబాబుకి కాస్త లీడ్ దొరికింది.. వంగవీటి రాధతో మాట్లాడారు.. రాధకు భద్రత కల్పించాలని డిమాండ్ చేసేశారు. రాధ హత్యకు రెక్కీ నిర్వహించినవారిని అరెస్టు చేయాలని కూడా డిమాండ్ చేసేశారు చంద్రబాబు.

ఇంకేముంది.? చంద్రబాబు కారణంగానే వంగవీటి రంగా హత్యకు గురయ్యారంటూ వైసీపీ నేతలు (కొందరు మంత్రులు కూడా) గళం విప్పడం మొదలు పెట్టారు. అలాంటి చంద్రబాబు నేతృత్వంలోని టీడీపీలో వంగవీటి రాధ ఎలా వుంటారంటూ వైసీపీ నేతలు ప్రశ్నించేస్తున్నారు. నిన్నటిదాకా రాధ అంటే మంచోడు.. ఇప్పుడేమో చెడ్డోడైపోయాడు వైసీపీ నేతలకి. ఈ వంగవీటి రాజకీయంలో వైసీపీ రంగులు మార్చుతున్న వైనం బెజవాడ వాసుల్ని ఆశ్చర్యానికి గురిచేస్తోంది.

నిజానికి, చంద్రబాబు మళ్ళీ పుంజుకునేందుకు రాధ రూపంలో అవకాశం దొరికింది గనుక, ఆయనా తనదైన స్టయిల్లో సరికొత్త స్క్రీన్ ప్లే కోసం సిద్ధమయిపోయారుగానీ, ఇన్నాళ్ళూ ఆయన రాధని ఎందుకు పట్టించుకోలేదట.? తిలా పాపం తలా పిడికెడు.. అన్నట్టు, వంగవీటి రాజకీయంలో వైసీపీ, టీడీపీ చెరి సగం భాగం తీసుకోవాల్సిందే.