టీడీపీకి ఊపిరిలూదుతున్న వైఎస్సార్సీపీ

‘మేమే అధికారంలో వుండాలి.. ఒక వేళ అధికారం చేజారితే.. వాళ్ళకి మాత్రమే అది దక్కాలి..’ అన్న అభిప్రాయం ఇటు వైఎస్సార్సీపీ, అటు తెలుగుదేశం పార్టీలో వున్నట్లు కన్పిస్తోంది. మరో రాజకీయ పార్టీకి రాష్ట్రంలో అధికారం దక్కకూడదన్నది ఈ రెండు రాజకీయ పార్టీల నిశ్చితాభిప్రాయం. తెలుగుదేశం పార్టీ ఇటీవలి కాలంలో దారుణంగా దెబ్బతినేసిన మాట వాస్తవం. ఆ పార్టీకి ఊపిరిలూదేందుకు వైఎస్సార్‌ కాంగ్రెస్‌ పార్టీ రకరకాల మార్గాలు అన్వేషిస్తోంది.

లేకపోతే, చంద్రబాబు ఉత్తరాంధ్రలో నిర్వహించనున్న ప్రజా చైతన్య యాత్రను అడ్డుకునేందుకు వైసీపీ శ్రేణులు ప్రయత్నించడమేంటి.? విశాఖలో ప్రస్తుతం పరిస్థితి నివురుగప్పిన నిప్పులా తయారైంది. మూడు రాజధానుల్ని టీడీపీ అధినేత చంద్రబాబు వ్యతిరేకిస్తున్నారు. ఈ నేపథ్యంలో చంద్రబాబుకి వ్యతిరేకంగా వైసీపీ చేసిన యాగీ అంతా ఇంతా కాదు. ఆ ‘యాగీ’కి సంబంధించి ఇప్పుడు జరుగుతున్నది నెక్స్‌ట్‌ లెవల్‌ అనే స్థాయిలో వుంది.

సహజంగానే టీడీపీ శ్రేణులు, వైసీపీ వ్యూహాల్ని తిప్పి కొట్టేందుకు ప్రయత్నిస్తాయి. తద్వారా టీడీపీ అధినేతపై సింపతీ ఆటోమేటిక్‌గా క్రియేట్‌ అవుతుంది. ఉత్తరాంధ్రలో టీడీపీకి బలమైన క్యాడర్‌ వుందన్న విషయం వైసీపీకి బాగా తెలుసు. విశాఖ కేంద్రంగా వైసీపీ ప్రభుత్వం ఎగ్జిక్యూటివ్‌ క్యాపిటల్‌ని ప్రకటించినా, ఆ మూడు జిల్లాల్లో ప్రభుత్వ నిర్ణయానికి అనుకూలమైన వాతావరణమైతే కన్పించడంలేదు.

విశాఖ ఇప్పటికే అభివృద్ధి చెందిన నగరం. ఒకవేళ విశాఖ ఎగ్జిక్యూటివ్‌ క్యాపిటల్‌ అయితే.. అక్కడ కొత్తగా కష్టాలు వచ్చిపడతాయేమోగానీ, కొత్త అభివృద్ధి ఏమీ వుండదన్నది మేధావుల అభిప్రాయం. కేంద్రం ఇప్పటికే విశాఖ కేంద్రంగా ప్రత్యేక రైల్వే జోన్‌ని ప్రకటించినా, వాల్టేర్‌ డివిజిన్‌ని ముక్కలు చేసింది. ఈ విషయమై కేంద్రాన్ని ప్రశ్నించలేని వైసీపీ, ఎగ్జిక్యూటివ్‌ క్యాపిటల్‌.. అంటూ కొత్త డ్రామాకి తెరలేపింది.

విభజన చట్టం ప్రకారం విశాఖకు చాలా చేయాల్సి వుంది కేంద్రం. ఈ విషయమై కేంద్రాన్ని నిలదీయలేని దుస్థితి వైసీపీది. మరోపక్క, గత ఐదేళ్ళ పాలనలో విశాఖను చంద్రబాబు ఉద్ధరించింది లేదాయె. ఎలా చూసినా వైసీపీ – టీడీపీ ‘మ్యాచ్‌ ఫిక్సింగ్‌’ కన్పిస్తోంది తప్ప.. రెండు పార్టీలకీ విశాఖపై చిత్తశుద్ధి లేదన్నది నిర్వివాదాంశం. ఎలాగైతేనేం, వైసీపీ ఆందోళనలతో టీడీపీ మైలేజ్‌ పెరిగిందని తెలుగు తమ్ముళ్ళు లోలోపల ఖుషీ అవుతుండడం గమనార్హం ఇక్కడ.